އޮޕަރޭޓިންގ ލައިސަންސް ހަމަވެފައިވާ ރިސޯޓްތަކާއި، ޓޫރިސްޓް ހޮޓެލްތަކާއި ގެސްޓްހައުސްތަކުގެ ލައިސަންސް އާކުރަން މުހުލަތެއްދީ ވަގުތީ ހުއްދަ ދޫކުރަން ނިންމާފައިވާކަމަށް މިނިސްޓްރީ އޮފް ޓޫރިޒަމުން ވިދާޅުވެއްޖެއެވެ.
ޓޫރިޒަމް މިނިސްޓްރީން ރޭ ނެރުނު ނޫސް ބަޔާނެއްގައި ވިދާޅުވީ، އޮޕަރޭޓިންގ ލައިސަންސް ނެތި މީހުންދިރިއުޅޭ ރަށްރަށުގައި ފަތުރުވެރިން ބައިތިއްބާނަމަ އެފަރާތްތަކުގެ މަޢުލޫމާތު 30 ދުވަހުގެ ތެރޭގައި އެ މިނިސްޓްރީއާ ހިއްސާކުރުމަށް ރަށު ކައުންސިލްތަކަށް އަންގާފައިވާ ކަމަށެވެ.
"އޮޕަރޭޓިންގ ލައިސަންސް ހަމަވެފައިވާ ތަންތަން، އޮޕަރޭޓިންގ ލައިސަންސްއެއް ދެވޭ ފެންވަރަށް އިސްލާޙުކުރުމަށް ފުރުޞަތު ދިނުމުގެ ގޮތުން، އެކަނަކްނ ރަނގަޅުކުރުމުގެ ޕްލޭނަކާއެކު ޕްރޮޕޯސަލް ހުށަހެޅުމަށް 30 ދުވަހުގެ މުއްދަތެއް ދިނުމަށް ނިންމާފައިވާ ކަމުގައިވެސް ދެންނެވިން." ޓޫރިޒަމް މިނިސްޓަރީގެ ނޫސް ބަޔާނުގައި ވިދާޅުވެފައިވެއެވެ.
މިނިސްޓްރީން ވިދާޅުވީ، ވަގުތީ ހުއްދަ ދޫކުރުމުގައި ތަނުގެ ސަލާމަތާއި ރައްކާތެރިކަމާއި، މުވައްޒަފުންގެ ހައްޤުތަކާއި، ދައުލަތައް ދައްކަންޖެހޭ ފައިސާގެ އިތުރުން މިނިސްޓްރީން ބަލާ އެހެނިހެން މިންގަނޑުތަކަށް ބައްލަވާނެ ކަމަށެވެ.
ޤާނޫނާއި ޤަވާއިދުތަކާ ޚިލާފަށް ޓުއަރިޒަމް މިނިސްޓްރީގެ ހުއްދަ ނެތި އެއްވެސް ތަނެއްގައި ފަތުރުވެރިން ނުބޭތިއްބުމަށްވެސް ޓޫރިޒަމް މިނިސްޓްރީން ވަނީ އިލްތިމާސް ކުރައްވާފައެވެ.
