މިމަހުގެ 2 ވަނަ ދުވަހ ރިލީޒްކުރި ޓައިގާ ޝްރޮފް އަދި ރިތިކް ރޯޝަން އެކުގައި ފެނިގެންދިޔަ ފިލްމް “ވޯ” ބޮކްސް އޮފީހުގެ ގިނަ ރިކޯޑްތަކެއް މުގުރާލައިފައިވަނިކޮށް، ފިލްމަށް މިހާރު މިވަނީ 3 ދުވަސްތެރޭގައި 100 ކްރޯޑްގެ އާމްދަނީއެއް ލިބިފައެވެ.
މި ފިލްމަށް ބެލުންތެރިންގެ ފަރާތުން ބޮޑޫ ތަރުހީބެއް ލިބެމުން އަންނައިރު، މި ފިލްމް ވެގެންގޮސްފައިވަނީ ބޮލީވުޑްގެ ފިލްމްތަކުގެ ތެރެއިން ފިލްމް އެޅުވި ފުރަތަމަ ދުވަހު އެންމެ ބޮޑު އާމްދަނީއެއް ލިބުނު ފިލްމަށެވެ. މީގެ ކުރިން މި މަގާމުގައި އޮތީ އާމިރު ހާން ލީޑު ރޯލުން ފެނިގެންދިޔަ ތަގްސްއޮފް ހިންދުންސްތާނެވެ.
ފިލްމު ރިލީޒްކުރި ފުރަތަމަ ދުވަހު އެ ފިލްމަށް 53.35 ކުރޯޑުގެ އާމްދަނީއެއް ލިބިފައިވާއިރު، ފިލްމް އެޅުވި ފުރަތަމަ ދެ ދުވަހުން ފިލްމަށްވަނީ 75 ކްރޯޑްގެ އާމްދަނީއެއް ލިބިފައެވެ.
100 ކްރޯޑްގެ ކްލަބަށް މި ފިލްމް މިހާރު ވަދެފައިވާއިރު، މި ފިލްމަކީ ޔާސް ޗޯޕްރާ ޕްރޮޑަކްޝަންގެ ފިލްމް ތަކުގެ ތެރެއިން 3 ދުވަސް ތެރޭގައި 100 ކްރޯޑްގެ އާމްދަނީއެއް ހޯދި 5 ފިލްމެވެ. މި ފިލްމާއެކު ދެން މި މަގާމުގައި އޮތީ، ސުލްތާން، ދޫމް 3، ޓައިގާ ޒިންދާހޭ އަދި ތަގްސް އޮފް ހިންދުސްތާނެވެ.
މީގެ އިތުރުން ރިތިކް އާއި ޓައިގާގެ ފިލްމުތަކުގެ ތެރެއިންވެސް ފުރަތަމަ ދުވަހު އެންމެ ބޮޑު އާމްދަނީއެއް ލިބުނު ފިލްމަކަށް “ވޯ ވެގެން ގޮސްފައިވާއިރު، ޗުއްޓީ ދުވަސްވަރު ރިލީޒްކުރި ފިލްމުތަކުގެ ތެރެއިންވެސް ފުރަތަމަ ދުވަހު އެންމެ ބޮޑު އާމްދަނީއެއް ލިބުނު ފިލްމަކީ “ވޯ” އެވެ.
