ރައީސުލްޖުމްހޫރިއްޔާގެ ނައިބު، ފައިޞަލް ނަސީމް މިނިސްޓަރ އޮފް އެޑިއުކޭޝަން ޑރ. ޢާއިޝަތު ޢަލީ އާއި އެޑިއުކޭޝަން ދާއިރާގެ އިސްވެރިންނާއި ބައްދަލުކުރައްވައި މަޝްވަރާކުރައްވައިފިއެވެ.
އޮންލައިންކޮށް ބޭއްވެވި މި މަޝްވަރާ ބައްދަލުވުމުގައި ރައީސުލްޖުމްހޫރިއްޔާގެ ނައިބު ވަނީ ކޮވިޑް-19ގެ ސަބަބުން ކުރިމަތިވެފައިވާ މި ދަތި ޙާލަތުގައި އެޑިއުކޭޝަން މިނިސްޓްރީން ދެމުންގެންދާ ޚިދުމަތްތަކާއި ކިޔަވާކުދިންގެ ކަންކަން ބެލެހެއްޓުމުގައި ކަންކަން އިންތިޒާމުކުރެވިގެން ކުރިޔަށްދާގޮތުގެ މަޢުލޫމާތު ހޯއްދަވާފައެވެ.
Vice President @FaisalNasym meets with the ExCo of MoE to discuss the education continuity plan and plans for school reopening. #COVID19 pic.twitter.com/LAlssQsdue
— Ministry of Education (@MoEdumv) May 9, 2020
އެގޮތުން މި ޙާލަތުގައި ސްކޫލުކުދިންގެ ކިޔެވުމުގެ ކަންކަން ކުރިޔަށްގެންދިއުމަށް ރޭވިފައިވާގޮތާއި އިންތިހާނުތައް ބޭއްވުން ފަދަ ކަންކަމާމެދު ޢަމަލުކުރާނެ ގޮތްތަކާއި އަދި ދަރިވަރުންގެ ކަންކަން މި ދުވަސްވަރު ބެހެއްޓުމަށް ރޭވިފައިވާ އިންތިޒާމުތަކާ ބެހޭގޮތުން ރައީސުލްޖުމްހޫރިއްޔާގެ ނައިބު ވަނީ މަޝްވަރާކުރައްވާފައެވެ. މީގެ އިތުރުން މިޙާލަތުގައި ޓީޗަރުންނާއި އަދި ދަރިވަރުންނަށް އަދި ޚާއްޞަ އެހީއަށް ބޭނުންވާ ކުދިންނަށް ހުރި ދަތިތައް އޮޅުންވިލުއްވައި ޓެލި ކްލާސްތަކާއި އޮންލައިން ކްލާސްތައް ގެންދިއުމުގައި ކަންކަން ރޭވިފައިވާ ގޮތުގެ މަޢުލޫމާތުވެސް އެމަނިކުފާނު ހޯއްދަވާފައިވެއެވެ.
މި ބައްދަލުވުމުގައި މިނިސްޓަރ އޮފް އެޑިއުކޭޝަންއާއި އެޑިއުކޭޝަން ދާއިރާގެ އިސްވެރިން ވަނީ ކޮވިޑް-19ގެ ޙާލަތަށްފަހު ސްކޫލުތައް ހުޅުވޭއިރު ކަންކަން ކުރިޔަށްގެންދާނެ ގޮތުގެ ޕްލޭންތަކާ ބެހޭގޮތުން މަޢުލޫމާތު ޙިއްޞާކުރައްވާފައެވެ. އެގޮތުން ސްކޫލުތައް ދެން ހުޅުވޭއިރު އިންތިޒާމުކުރަންޖެހޭ ކަންކަމާއި ރައްކާތެރިކަމުގެ ގޮތުން އަޅަންރޭވިފައިވާ ފިޔަވަޅުތަކާ ބެހޭގޮތުންވެސް މިނިސްޓަރ އޮފް އެޑިއުކޭޝަންއާއި އަދި ދާއިރާގެ އިސްބޭފުޅުން މަޢުލޫމާތު ޙިއްޞާކުރައްވާފައިވެއެވެ.
މި ބައްދަލުވުމުގައި ރައީސުލްޖުމްހޫރިއްޔާގެ ނައިބު ވަނީ މި ޙާލަތުގައި މަސައްކަތްކުރާއިރު ތަޢުލީމީ ދާއިރާގެ ހުރިހާ ފަރާތްތަކުންވެސް އެކަކު އަނެކަކާ ގުޅިގެން މަސައްކަތްކޮށް ދިމާވާ މައްސަލަތައް ހައްލުކޮށްގެން ކަންކަން ކުރިޔަށްގެންދިއުމަށާއި ޞިއްޙީ މާހިރުންގެ އިރުޝާދާ އެއްގޮތަށް ކަންކަން ބައްޓަންކުރައްވައިގެން ކުރިޔަށް ގެންދިއުމަށް ހުރިހާ ފަރާތްތަކުގެ ކިބައިން އެދިވަޑައިގަންނަވާފައެވެ.
ކޮވިޑް-19 އާއި ގުޅިގެން 2020 މާރިޗު 12 ވަނަ ދުވަހުން ފެށިގެން ސްކޫލްތަކުގެ ކިޔެވުން ވަނީ މެދުކަނޑާލައިފައެވެ. ނަމަވެސް މިނިސްޓަރ އޮފް އެޑިޔުކޭޝަން ޢާއިޝަތު ޢަލީ ވަނީ އޮންލައިން ކްލާސްތައް ވަރަށް އަވަހަށް ފެށިގެން ދާނެކަމަށް ވިދާޅުވެފައެވެ. ކިޔެވުން މެދު ކެނޑިފައިވާއިރު މިއަހަރު ބޭއްވުމަށް ހަމަޖެހިފައި އޮތް އޯލެވެލް އާއި އޭލެވެލް އިމްތިހާނުވެސް މިއަހަރު ނުބޭއްވުމަށް ވަނީ ނިންމާފައެވެ.
