ރާއްޖެ ހިމެނޭ ސަރަޙައްދުގައި މިހާރު އުފެދިފައިވާ ކޮޅިގަނޑުގެ ސަބަބުން ރާއްޖޭގެ އެކި ހިސާބުތަކަށް ބޯކޮށް ވާރޭވެހި، ކުރަމުންދާ ގަދަ ވިއްސާރައިގައި ބައެއް ރަށްރަށުގައި ފެން ބޮޑުވެއްޖެއެވެ.
އެގޮތުން އެންމެ ދެކުނުގައި އޮންނަ އައްޑޫ ސިޓީގެ ބޮޑު ސަރަޙައްދެއްގައިވަނީ ފެންބޮޑުވެފައެވެ. މިއަދު މެންދުރު 1:00 ހާއިރު ފަށައިގެން ހުއްޓުމެއް ނެތި ދަނީ އައްޑޫއަށް ވާރޭ ވެހެމުންނެވެ.
އައްޑޫ ސިޓީގެ ގުޅިފައިވާ ރަށްތަކުގެ ގިނަ ސަރަޙައްދުތަކުގައި ފެންބޮޑުވެ ބައެއް ގެތަކަށްވެސް ފެނުގެ އަސަރު ކުރަމުންދާކަމަށްވެސް މަޢުލޫމާތު ލިބިފައިވެއެވެ.
މިއަދު މެންދުރުފަހުން ފެށިގެން ހުއްޓާނުލާ ވެހުނު ވާރެއާއެކު ފޮނަދޫގައިވެސްވަނީ ފެންބޮޑު ވެފައެވެ. ފޮނަދޫގައިވެސް ބައެއް ގެތަކަށް ފެން ވަންނަމުންދާއިރު ފެން ހިއްކުމުގެ މަސައްކަތުގައި އެމްއެންޑީއެފް ފަޔާ އެންޑް ރެސްކިއު ސާވިސަސް އަދި ޕަބްލިކް ވޯކްސްއިން މިހާރު ހަރަކާތްތެރިވާން ފަށާފައިވާ ކަމަށް އެރަށު ކައުންސިލުން މަޢުލޫމާތު ދެއްވައެވެ.
ލ. މާމެންދޫގައިވެސް ވަރަށް ބޮޑަށް ފެންބޮޑުވެފައިވާ ކަމުގެ މަޢުލޫމާތުދަނީ ލިބެމުންނެވެ. ލ.މާމެންދޫގައި ފެންބޮޑުވެ ފަސް ވަރަކަށް ގެއަކަށް ފެންވަދެފައިވާކަމަށް ފުލުހުން ވިދާޅުވިއެވެ. އަދި ފުލުހުންނާއި އެރަށުގެ ކައުންސިލް އިން ގުޅިގެން ފެން ވަދެފައިވާ ގެތަކުގެ ދޮރުމަތީގައި ވެލިބަސްތާ ޖަހައިދީ އެފަރާތްތަކަށް އެހީތެރިވުމުގެ މަސައްކަތް ކުރަމުން އަންނަކަމަށްވެސް ފުލުހުން ވިދާޅުވިއެވެ. މާމެންދޫ އިންޖީނު ގެއަށް ފެންވަދެ އެރަށުން ކަރަންޓް ކަނޑާލާފައިވާ ކަމުގެ މަޢުލޫމާތުވަނީ ލިބިފައެވެ.
މެޓް އޮފީހުން އެންމެފަހުން ނެރުނު އިންޒާރުގައި ވާވު އަތޮޅުން އައްޑޫ ސިޓީއަށް ގުގުރުމާއެކު ބޯކޮށް ވާރޭ ވެހޭނެކަމަށް ބުނެފައިވެއެވެ. މިރޭ 21:00 ން 00:00 އަށް ނެރުނު މިއިންޒާރުގައި ވިލާގަނޑުގައި ވިލާގަނޑުގައި 45 މޭލަށް ވައިގަދަވާނެކަމަށް ލަފާކޮށްފައިވެއެވެ.
