ޗެލްސީ ދޫކޮށް ހަޒާޑު އަންނަ ސީޒަންގައި ރެއަލްމެޑްރިޑާއި ގުޅޭނެކަމަށް ގިނަ ބަޔަކު ޔަޤީންކުރަމުންދަނިކޮށް ހަޒާޑުގެ ޖާޒީއެއް ރެއަލްމެޑްރިޑް ' އޮފިޝަލް ސްޓޯރ ' ގައި ހުއްޓާ ފެނިއްޖެއެވެ.
2018 ވަނަ އަހަރުގެ ހޫނު މޫސުމުން ފެށިގެން ރެއަލްމެޑްރިޑަށް ބަދަލުވާން އުޅޭކަމުގެ އަޑުތައް އަރަމުންދާ ހަޒާޑު، ޗެލްސީ ދޫކޮށް އަންނަ ސީޒަންގައި ރެއަލްމެޑްރިޑާއި ގުޅުމުގެ ހުރިހާކަމެއް ނިމިފައިވާކަމަށް ރިޕޯޓްތައް ބުނެއެވެ.
88 މިލިއަން ޕައުންޑުގެ ބިޑެއް ރެއަލްމެޑްރިޑުން ހަޒާޑަށް ހުށައަޅާފައިވާއިރު އިތުރު ޚަރަދުތަކާއެކު މިބިޑް 130 މިލިއަން ޕައުންޑަށް އަރާނެކަމަށް ރިޕޯޓްތައްބުނެއެވެ.
ހަޒާޑުގެ ޖާޒީއެއް ރެއަލްމެޑްރިޑް ' އޮފިޝަލް ސްޓޯރ ' ގައި ހުއްޓާ ފެނިފައިވާއިރު އެޖާޒީގައި ޖަހާފައިވަނީ ޖާޒީ ނަންބަރު 7 ކެވެ. ކްރިސްޓިއާނޯ ރޮނާލްޑޯ ރެއަލްމެޑްރިޑްގެ މިޖާޒީއާއެކު އެކްލަބަށް އެތަށް ކާމިޔާބީތަކެއް ހޯދައިދީފައިވެއެވެ. މިދިޔަ އަހަރު ރެއަލްމެޑްރިޑް ދޫކޮށް ޔުވެންޓަސްއަށް ރޮނާލްޑޯ ދިޔަފަހުން މިނަންބަރަށް ކުޅެމުން އަންނަނީ ހަމައެހަރު އެކްލަބާއި ގުޅުނު މަރިއާނޯ ޑިއާޒްއެވެ.
ޔޫރޮޕާ ލީގު ފައިނަލްގައި 4-1 ގެ ނަތީޖާއަކުން މިދިޔަ ހަފްތާގައި އާސެނަލް ބަލިކުރި މެޗަށްފަހު މުސްތަޤުބަލާމެދު ގޮތެއް ނިންމާފައިވާނެކަމަށާއި އެކަން ޗެލްސީއަށް އެކަން އޭގެ ދެހަފްތާކުރިން އަންގާފައިވާނެކަމަށް ހަޒާޑުވަނީ ބުނެފައެވެ.
" ހުރިހާ ބާރެއް އޮތީ ކްލަބް އަތުގަ. ދެކްލަބް ވެގެން ގޮތެއް ނިންމާނީ. ސަޕޯޓަރުންނެކޭ އެއްގޮތަށް އަހަރެންވެސް ވާނޭ ގޮތެއްގެ އިންތިޒާރުގައި މިހުރީ. ކުރިއަށްއޮތް ދެތިން ހަފްރާތެރޭ އެނގޭނެކަމަށް މިބަލަނީ. " ޔޫރޮޕާ ލީގު ފައިނަލަށްފަހު ހަޒާޑު ބުންޏެވެ.
ޔޫރޮޕާ ލީގު ފައިނަލަކީ ޗެލްސީއަށް ކުޅުނު ވަދާޢި މެޗުކަމުގައި ވެދާނެކަމަށާއި އަބަދުވެސް ދެކެމުންއައި ހުވަފެނަކީ ޕްރިމިއާ ލީގަށް ކުޅުންކަމުގައި ވީއުރު 7 އަހަރު ވަންދެން އެކަން ކުރިކަމަށް ހަޒާޑު ބުންޏެވެ. އަދި އާތަޖުރިބާއެއް ބޭނުންކަމަށާއި މިއީ އެވަގުތުކަމަށްވެސް ހަޒާޑު އެމެޗަށްފަހު ބުނެފައިވެއެވެ.
މީގެ އިތުރުން ހަޒާޑުގެ ނިންމުމަށް ހުރަސް ނޭޅުމަށް ޗެލްސީގެ އިސް ކުޅުންތެރިން ޗެލްސީގެ ކިބައިން އެދިފައިވެއެވެ.
ހަޒާޑުގެ ޖާޒީ ރެއަލްމެޑްރިޑް ' އޮފިޝަލް ސްޓޯރ ' ގައި ހުއްޓާ ފެނިފައި މާގިނައިރުތަކެއްނުވަނީސް ރެއަލްމެޑްރިޑުން ހަޒާޑު ރެއަލްއާއި ގުޅިފައިވާކަންވަނީ ކަށަވަރުކޮށްދީފައެވެ.
މެޑިކަލް ޓެސްޓްތަކަށްފަހު ހަޒާޑު ރެއަލްމެޑްރިޑްގެ ކުޅުންތެރިއެއްގެ ގޮތުގައި ރަސްމީގޮތުން ދައްކާލުން ސަންޓިއާގޯ ބާނަބޯގައި އޮންނާނީ މިމަހުގެ 13 ވަނަ ދުވަހުއެވެ.
