ބަދިގެތެރޭން މިއަދު މިގެނެސްދެނީ ޗޮކްލެޓް އައިސްކްރީމް ކޭކު ތައްޔާރުކުރާނެގޮތެވެ.

ކޭކު ތައްޔާރުކުރުމަށް ބޭނުންވާތަކެތި:

• 100 ގްރާމް ޗޮކްލެޓް (ކުދިކޮށް ކޮށާލާފައި)
• 200 އެމްއެލް ކިރު (ފުލްކްރީމް)
• 20 ގްރާމް ހަކުރު (މުގުރާފައި)
• 15 ގްރާމް ކޯން ފްލާ
• 10 ގްރާމް ކޮކޯ ޕައުޑާރ
• 100 ގްރާމް ޔޯގަޓް
• 10 ގްރާމް ހަކުރު
• 200 ހެވީ ކްރީމް
• 5 އޯރިއޯ ބިސްކޯދު

ކްރީމްގަނޑު ތައްޔާރުކުރުމަށް ބޭނުންވާތަކެތި:

• 50 ގްރާމް ޗޮކްލެޓް (ކުދިކުދިކޮށް ކޮށާފައި)
• 20 އެމްއެލް ކިރު (ފުލް ކްރީމް)

ތައްޔާރުކުރާނެގޮތް:

ކޭކު ތައްޔާރުކުރުމަށްޓަކާ އެންމެ ފުރަތަމަ ތެއްޔެއްގައި ކިރު، 20 ގްރާމް ހަކުރު، ކޯން ފްލާ އަދި ކޮކޯ ޕައުޑާރ އަޅާ މިކްސް ކޮށްލާށެވެ. ދެން އުނދުން މަށްޗަށް އުދުމަށްފަހު މަޑު ގިނީގައި ހާކަމުން ގެންދާށެވެ. ރަނގަޅަށް ހޫނުވެ އޮލަވެލީމައި އުނދުން ނިއްވާލުމަށްފަހު ޗޮކްލެޓްކޮޅު އަޅާ މެލްޓް ވަންދެން ހާކާލާށެވެ. ދެން ތައްޓަކަށް އޮށްސާލުމަށްފަހު ޔޯގަޓްކޮޅު އަޅާ މިކްސް ކޮށްލާށެވެ. އެއަށްފަހު ހެވީ ކްރީމް އަދި 10 ގްރާމް ހަކުރު މިކްސާރ އަކުން (ފޮނުގަނޑު އަރާވަރަށް)  މިކްސް ކޮށްލާށެވެ. ދެން އެންމެފުރަތަމަ އެއްކުރި ކްރީމް ގަނޑާއި އެއްކޮށްލާށެވެ. ދެން ޓްރޭއެއްގެ ތެރެއަށް ތައްޔާރުކުރި ކްރީމްގަނޑުގެ އެއްބައި އެޅުމަށްފަހު ވަށައިގެން ބިސްކޯދު ތަށް އަތުރާލުމަށްފަހު އޭގެ މައްޗަށް ކްރީމްގަނޑުގެ އަނެއްބައި އަޅާލާށެވެ. (ބޭނުންނަމަ މިގޮތަށް އިތުރު ލޭޔާސް ތަށް އެޅިދާނެއެވެ) ދެން ކޭކު ގަނޑުކޮށްލުމަށްޓަކައި އައިސަލަމާރިއަށް ލާށެވެ.

ދެން ކޭކުގެ މައްޗްށް އަޅާ ކްރީމްގަނޑު ތައްޔާރުކުރުމަށްޓަކައި ޗޮކްލެޓްކޮޅު އަވަނުން ނުވަތަ އުނދުނުން މެލްޓްކޮށްލާށެވެ. މެލްޓްވުމުން އޭގެ ތެރެއަށް މިލްކް ކޮޅު އަޅާ ރަނގަޅަށް އެއްކޮށް ލާށެވެ. ދެން ކޭކު ގަނޑުވުމުން ނަގާ ތައްޓެއްގެ މަތީ ބެހެއްޓުމަށްފަހު ތައްޔާރުކުރި ކްރީމްގަނޑު ކޭކުގެ މައްޗަށް އަޅާލާށެވެ.

މިހާރުމިވަނީ ޗޮކްލެޓް އައިސްކްރީމް ކޭކު ތައްޔާރުކޮށް ނިމިފައެވެ. ކޭކު އިތުރަށް ފުރިހަމަ ކޮށްލުމައްޓަކައި ޗެރީ ނުވަތަ ސްޓޯބެރީ ފަދަ އެއްޗެއް ކޭކުގެ މަތީގައި އަތުރާލެވިދާނެއެވެ.