ރާއްޖޭގައި ބާއްވާނެ އެންމެ ބޮޑު މަލްޓިލޭޓަރަލް ބައްދަލުވުން، މޯލްޑިވްސް ޕާޓްނާޝިޕް ފޯރަމްގައި ބައިވެރިވާ ބޭރުގެ ވަފުދުތައް ރާއްޖެ އަންނަން ފަށައިފިއެވެ.
ފޮރިން މިނިސްޓްރީން ވިދާޅުވީ، މިމަހުގެ 17 އަދި 18 ގައި ބާއްވާ ފޯރަމުގައި ބައިވެރިވާ ބޭރުގެ ވަފްދުތައް ރާއްޖެ އަންނަން ފަށާފައިވާ ކަމަށާއި، މިއަދާއި މާދަމާ ގިން ވަފްދުތަކެއް ރާއްޖެ ވަޑައިގަންނަވާނެ ކަމަށެވެ. އެގޮތުން ރާއްޖެއަށް ކަނޑައަޅުއްވާފައި މާލެ، ކޮޅުނބު އަދި ދިއްލީގައި ތިއްބަވާ ގިނަ ސަފީރުން ފޯރަމްގައި ބައިވެރިވެވަޑައިގަންނަވާނެ ކަމަށް ފޮރިން މިނިސްޓްރީން މައުލޫމާތުދެއްވައެވެ.
ފޮރިން މިނިސްޓްރީއިން އިންތިޒާމްކޮށްގެން ބާއްވާ މި ފޯރަމަކީ މިހާތަނަށް އެންމެ ގިނަ އަދަދަކަށް ބޭރުގެ އިސް ބޭފުޅުނ ބައިވެރިވެވަޑައިގެން ރާއްޖޭގައި ބާއްވާ ފޯރަމެވެ.
ޕާޓްނާޝިޕް ފޯރަމަށް ވަޑައިގަންނަވާ ބޭފުޅުންނަށް މާދަމާ ރޭ ހާއްސަ ރިސެޕްޝަނެއް ބާއްވަން ހަމަޖެހިފައިވާއިރު، މާދަމާ ފޮރިން މިނިސްޓަރު އަބްދުﷲ ޝާހިދު ފޯރަމާ ގުޅޭ ގޮތުން ނޫސްވެރިންނަށް މައުލޫމާތު ދެއްވުމަށް ވެސް ވަނީ ހަމަޖެހިފައެވެ.
"އިންވެސްޓިން އިން އަ ރިޒިލިއެންސް އެންޑް ސަސްޓައިނަބަލް މޯލްޑިވްސް" ޝިއާރުގެ ދަށުން ކުރިނބީ މޯލްޑިވްސްގައި ބާއްވާ މި ފޯރަމަށް ދިވެހި ސަރުކާރުން ވަނީ ވަރަށް ބޮޑަށް ތައްޔާރުވެފައެވެ.
އަންނަ ހޯމަ ދުވަހު ހެނދުނު ނުވައެއް ޖަހާއިރު ފެށުމަށް ހަމަޖެހިފައިވާ މި ފޯރަމް ފެށުމުގެ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހާއި، ފޮރިން މިނިސްޓަރު ޝާހިދު އަދި ފިނޭންސް މިނިސްޓަރު އަމީރު ވާހަކަފުޅު ދައްކަވާނެއެވެ.
