މިމަހުގެ 22 ން އަންނަ މަހުގެ 20 ށް ބޭއްވުމަށް ހަމަޖެހިފައިވާ އެފްރިކާ ކަޕް އޮފް ނޭޝަންސްގައި ސެނެގޯލް ކުޅޭ ފުރަތަމަ މެޗަށް މާނޭ ސަސްޕެންޑް ވެދާނެކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.
އެފްރިކާގެ ފުޓްބޯޅަ އެސޯސިއޭޝަންއިން އެކަން ކަށަވަރުކޮށްދީފައި ނުވިނަމަވެސް، ސެނެގޯލް އެންމެ ފަހުން ކުޅުނު ދެމެޗުގައިވެސް މާނޭއަށް ރީނދޫ ކާޑު ދައްކާފައިވުމުން އެފްރިކާ ކަޕްގައި ތަންޒަނިއާ އާއި ދެކޮޅަށް ސެނެގޯލް ނިކުންނަ މެޗުގައި މާނޭ ފެނުމުގެ އުންމީދު ވަރަށް ކުޑައެވެ. އަދި މާނޭ ސަސްޕެންޑް ވާނެތޯ ކަށަވަރުކުރުމަށް ސެނެގޯލްއިން އެފްރިކާގެ ފުޓްބޯޅަ އެސޯސިއޭޝަނަށް މިހާރު ހުށައަޅާފައިވާކަމަށްވެސް ރިޕޯޓްތައް ބުނެއެވެ.
އުމުރުން 27 އަހަރުގެ މާނޭ ސެނެގޯލްއަށް 60 މެޗު ކުޅެދީފައިވާއިރު 16 ލަނޑު ކާމިޔާބުކޮށްދީފައިވެއެވެ.
"މާނޭ ޓީމުގައި ހުރުމުން ޔަޤީނުންވެސް އޭގެ ފައިދާ ކުރާނެ. އެކަމަކު މާނޭ ނެތިވެސް އަހަރެމެންނަކީ ވަރުގަދަ ޓީމެއް" ސެނެގޯލްގެ ކޯޗު ސިސޭ ބުންޏެވެ.
މިއަހަރު މިސްރުގައި ކުޅުމަށް ހަމަޖެހިފައިވާ އެފްރިކާ ކަޕް އޮފް ނޭޝަންސްއަކީ މާނޭގެ ތިންވަނަ އެފްރިކާ ކަޕެވެ. އަދި މުބާރާތުގެ ފުރަތަމަ މެޗު މާނޭއަށް ގެއްލޭ މިއީ ދެވަނަ ފަހަރެވެ. 2015 ވަނަ އަހަރު ގާނާއާއި ދެކޮޅަށް ކުޅުނު މެޗުގައިވެސް މާނޭއަށް ކުޅެވިފައިނުވާއިރު އެމެޗުގައި މާނޭއަށް ނުކުޅެވުނީ ލިބިފައިވާ އަނިޔާއަކާއި ގުޅިގެންނެވެ.
ލިވަޕޫލްއާއެކު މިސީޒަންގެ ޗެމްޕިއަންސް ލީގު ކާމިޔާބުކޮށްފައިވާ މާނޭ ސެނެގޯލް ޓީމާއެކު ސްޕެއިންގައި ބާއްވާ ފަަރިތަކުރުން ތަކުގައި ބައިވެރިވުމަށް މިހާރުހުރީ ސްޕެއިންގައެވެ.
މާނޭއަށް ސެނެގޯލްގެ ފުރަތަމަ މެޗު ގެއްލުނު ނަމަވެސް ގްރޫޕް ސްޓޭޖްގައި ބާކީއޮތް މެޗުތަކުގައި ކުޅެވޭނެއެވެ. ތަންޒަނިއާ އަދި ސެނެގޯލްގެ އިތުރުން މިގްރޫޕްގައި ދެން ހިމެނެނީ އަލްޖީރިއާ އަދި ކެންޔާއެވެ.
