ހދ. ނޭކުރަންދޫގެ ކުޅިވަރު އެކަޑަމީއެއް ކަމުގައިވާ، ޒާހިރު ސްޕޯޓްސް އެކަޑަމީގެ ވެބްސައިޓް ލޯންޗުކޮށްފިއެވެ.
އެކަޑަމީގެ ވެބްސައިޓް ލޯބްޗުކޮށްފައިވަނީ އެކަމަށްޓަކައި އިއްޔެ ހަވީރު ނޭކުރަންދޫގައި ބޭއްވުނު ހާއްސަ ރަސްމިއްޔާތެއްގައެވެ. މި ރަސްމިއްޔާތު ޝަރަފްވެރިކޮށްދެއްވައި ވެބްސައިޓް ލޯންޗުކޮށްދެއްވީ ނޭކުރެންދޫގެ ކުރީގެ މަޝްހޫރު ފުޓްބޯޅަ ކުޅުންތެރިއެއްކަމަށްވާ އަލްފާޟިލް ދާއޫދު އިބްރާހީމެވެ.
މިރަސްމިއްޔާތުގައި ވާހަކަދެއްކަވަމުން އެކަޑަމީގެ ރައީސް މުޙައްމަދު ޒާހިރު ވަނީ، އެކަޑަމީގެ އެންމެހާ ކަންކަމުގައި އެހީތެރިވެދެއްވި އަދި މިހާރުވެސް އެހީތެރިވެދެއްވާ އެންމެހާ ފަރާތްތަކަށް ޝުކުރު އަދާކޮށްފައެވެ.
އެކަޑަމީގެ ފަރާތުން ސީނިއާ ޒުވާން އަންހެން ހޭންޑްބޯލް ޓީމެެއް އެކުލަވާލުމުގެ މަސައްކަތް މިހާރު ކުރިއަށް ދާއިރު، ގްރޭޑް 5 ން ފެށިގެން 10 ގެ އަންހެން ދަރިވަރުންނަށް ހޭންޑްބޯލް ކްލާސްތަކެއް ކުރިއަށް ގެންދިއުމަށް ނިންމާފައިވާކަން އިއްޔެގެ ހަފްލާގައި ޒާހިރު އިޢުލާނުކުރިއެވެ.
މީގެ އިތުރުން މި ރަސްމިއްޔާތުގައި ވަނީ އެކަޑަމީން ކޮންމެ މަހަކު ހޮވާ އެންމެ ރަނގަޅު ދަރިވަރުންގެ ތެރެއިން 2021 އޮގަސްޓް މަހުގެ އެންމެ ރަނގަޅު ދަރިވަރަށް ސެޓްފިކެޓްވެސް ހަވާލުކޮށްފައެވެ. މިގޮތުން ސެޓްފިކެޓް ޙަވާލުކޮށްދެއްވީ ނޭކުރެންދޫގައި ކުޅިވަރުގެ ދާއިރާއަށް ގިނަ ޚިދުމަތްތަކެއް ކޮށްދެއްވާފައިވާ ފަރާތެއްކަމުގައިވާ އަލްފާޟިލް ޙަސަން އިބްރާހީމެވެ.
ޒާހިރު ސްޕޯޓްސް އެކަޑަމީން ބުނީ، އެކަޑަމީގެ ވެބްސައިޓެއް ތައާރަފްކުރުމުގެ މަގުސަދަކީ އެކަޑަމީން ހާއްސަކޮށްގެން ކުރިއަށްގެންދާ ހަރަކާތްތައް ކައިރިންނާއި ދުރުން އާއްމުންނަށް އެނގިގެންދިއުން ކަމަށެވެ.
މި އެކަޑަމީ ފަރާތުން ހޭންޑްބޯލް ކޯޗިންގ ކޭމްޕްތައް ކުރިއަށް ގެންދިއުމުގެ އިތުރުން، ކުޑަކުދިންނަށް ފުޓުބޯޅަ ތަމްރީނު ކޮށްދިނުމުގެ ހަރަކާތްތައްވެސް މީގެ ކުރިން ވަނީ ހިންގައިފައެވެ. އެގޮތުން މިހަރަކާތްތައް މިހާރުވެސް ކުރިއަށްދާކަމަށް އެކަޑަމީން ފާހަގަކުރެއެވެ.
މިރަސްމިއްޔާތުގައި އެކަޑަމީގެ ދަރިވަރުންނާއި ބެލެނިވެރިންގެ އިތުރުން ކްލަބް ޖަމްޢިއްޔާތަކުގެ މެމްބަރުންނާއި މުއައްސަސާތަކުގެ ވެރިންނާއި، ރަށު ކައުންސިލަރުން އަދި ކުޅިވަރަށް ސަޕޯޓުކުރާ ފަރާތްތަކާއި ކުރީގެ މޮޅެތި ފުޓުބުޅަ ކުޅުންތެރިންވެސް ބައިވެރިވެފައިވެއެވެ.
