ދަރިފުޅުގެ ސިފަ ޖެހިގެން ބުރެޒިލުގެ ޖަލަކުން މިދިޔަ ހޮނިހިރު ދުވަހު ފިލަން އުޅުނު ގައިދީ އަމިއްލައަށް މަރުވެއްޖެ އެވެ.
ބުރެޒިލުގެ ޚަބަރުފަތުރާ ވަސީލަތްތަކުން ބުނެފައިވަނީ އުމުރުން 42 އަހަރުގެ ކުލައުވިނޯ ޑަސިލްވާ މަރުވެފައިވަނީ އޭނާ ހައްޔަރު ކޮށްފައި ހުރި ޖަލު ގޮޅީގައި ދަންޖެހިގެން ކަމަށެވެ. ކުލައުވިނޯ ޑަސިލްވާ ޖަލަށް ލައިފައިވަނީ މަސްތުވާތަކެތި ވިއްކުމުގެ މައްސަލައެއްގައެވެ.
73 އަހަރަށް ޖަލަށް ލުމަށް ހުކުމް ކޮށްފައިވާ ކުލައުވިނޯ ޑަސިލްވާ ޖަލުން ފިލުމަށް މަސައްކަތް ކޮށްފައިވަނީ އޭނަގެ 19 އަހަރުގެ އަންހެން ދަރިފުޅުގެ ސިފަ ޖެހިގެންނެވެ. މިގޮތުން ސިފަ ބަދަލުކުރުމަށްޓަކައި މީނާވަނީ އިސްތަށިގަނޑަކާއި އަދި ރަބަރު މާސްކެއް ބޭނުން ކޮށްފައެވެ. އަދި ޖަލުން ފިލަން އުޅެފައިވަނީ އަންހެން ދަރިފުޅު އައުމުން އޭނާ ޖަލު ގޮޅީގައި ބެހެއްޓުމަށް ފަހުގައެވެ.
ނަމަވެސް ޖަލު ބަލަހައްޓަންތިބި ގާޑުންވަނީ މީނާ ހައްޔަރު ކޮށްފައެވެ. އަދި ސިފަ ބަދަލު ކުރުމަށް ބޭނުންކުރި ތަކެއްޗާއެކު ވީޑިއޯކޮށް އާންމު ކޮށްފައެވެ.
ކުލައުވިނޯ ޑަސިލްވާވަނީ 2013 ވަނަ އަހަރުވެސް ޖަލުން ފިލައިފައެވެ. ނަމަވެސް މިފަހަރުވެސް ޖަލު ގާޑުންވަނީ ކުލައުވިނޯ ޑަސިލްވާ އަލުން ހައްޔަރުކޮށް ޖަލަށް ލައިފައެވެ.
