މަސްވެރިކަމަށް ނިކުމެ އުޅެނު ދޯންޏެއްގައި ހުރި ދިވެހި ފަޅުވެރިއެއްގެ ހާލު ދެރަވެގެން އެމަޖެންސީގައި ހުޅުމާލެ ހޮސްޕިޓަލަށް ގެންގޮސްދީފިއެވެ.
އެމްއެންޑީއެފް އިން ވިދާޅުވީ، ކ.ބޮޑުކަޅީގެ އިރުން 8 ނޯޓީކަލް މޭލު ބޭރުން މަސްވެރިކަން ކުރަން އުޅުނު "ވިލާ ވާލި-13" ނަމަކަށް ކިޔާ ދޯނީގައި ހުރި 54 އަހަރުގެ ދިވެހި ފަޅުވެރިއަކު ހާލު ދެރަވެގެން، އެމްއެންޑީއެފްގެ އެހީތެރިކަމަށް އެދުނީ މިއަދު ހެނދުނު 08:09 ހާއިރު ކަމަށެވެ.
"އަވަސް ފަރުވާއަށް އެދުމާއި ގުޅިގެން އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަން އިން އެހީތެރިކަން ފޯރުކޮށްދީ، މިއަދު ހެނދުނު 09:10 ހާއިރު އެމީހާ ހުޅުމާލެ ހޮސްޕިޓަލަށް ގެންގޮސްދީފައިވާނެ." އެމްއެންޑީއެފް އިން ވިދާޅުވިއެވެ.
މަސްވެރިކަމަށް ނިކުމެ އުޅޭ އުޅަނދުފަހަރުގައި ތިބޭ މީހުންނަށް ކުއްލިއަކަށް ދިމާވާ މިފަދަ ހާދިސާތަކުގައި އަވަސް ފަރުވާދީ، ޞިއްޙީ ފަރުވާދޭ މަރުކަޒުތަކަށް ގެންގޮސްދިނުމުގައި ސަލާމަތީ ބާރުތަކުން ދަނީ ނަމޫނާ ދައްކަމުންނެވެ.
