ގިރިފުށީ ޓްރޭނިންގ ސެންޓަރުގައި ތަމްރީނު ހަދަމުން ދިޔަ ބޭކަލަކު ކުއްލި ގޮތަކަށް ނިޔާވެއްޖެއެވެ.
އެމްއެންޑީއެފް އިން ވިދާޅުވީ މިއަދު ހެނދުނު ނިޔާވެފައި ވަނީ އެމްއެންޑީއެފްގެ މެރިން ޑިޕްލޮއިމަންޓް ޔުނިޓް (އެމްޑީޔޫ) 2 ގައި މަސައްކަތް ކުރައްވާ ސްޓާފް ސާޖަންޓް ޢަލީ ރިޔާޒް އެވެ. ސްޓާފް ސާޖަންޓް ޢަލީ ރިޔާޒް މިއަދު ހެނދުނު ހުޅުމާލޭގައި އޮތް ބީއެފްޓީ ޓެސްޓެއް ވަނީ ޖަހާފައެވެ. އަދި ހެނދުނު އެނބުރި ގިރިފުއްޓަށް ގޮސް، ބަނޑަށް ވައިގެ އުނދަގޫތަކެއް ވާކަމަށް ކައިރީގައި ހުރި ދަރިވަރަކު ކައިރީގައި ބުނިތަނާހެން ގައިން ވަރުދޫވެގެން ވެއްޓުނުކަމަށް އެމްއެންޑީއެފް ވަނީ ވިދާޅުވެފައެވެ.
ސްޓާފް ސާޖަންޓް ރިޔާޒް ވެއްޓުމާއިއެކު ވަގުތުން އިމަޖެންސީގައި މާލެ ގެނެސް އޭޑީކޭ ހޮސްޕިޓަލަށް ގެންދެވިފައިވާ ކަމުގައިވެސް އެފަރާތުން ވިދާޅުވެއެވެ.
ސްޓާފް ސާޖަންޓް ރިޔާޒް ގެ ހަށިގަނޑު މި ވަގުތު އޮތީ އޭޑީކޭ ގައެވެ.
މަރްޙޫމް ސްޓާފް ސާޖަންޓް ރިޔާޒްގެ މޫނު ދެއްކުން އޮންނާނީ މިއަދު މެންދުރު ފަހު 14:30 ގައި އާސަހަރާގައެވެ. ކަށުނަމާދު ކުރުމަށް ހަމަޖެހިފައިވަނީ މިއަދު މަޤުރިބު ނަމާދަށްފަހު އިސްލާމީ މަރުކަޒުގައެވެ.
ސްޓާފް ސާޖަންޓް ޢަލީ ރިޔާޒް (ސަރވިސް ނަންބަރު: 5055) ދ.ކުޑަހުވަދޫއަށް އުފަން ސްޓާފް ސާޖަންޓް ޢަލީ ރިޔާޒް ސިފައިންގެ ޚިދުމަތާ ގުޅިލައްވާފައި ވަނީ 2003 ފެބްރުވަރީ 18 ވަނަ ދުވަހުގައެވެ. ސިފައިންގެ ޚިދުމަތުގައި ސްޓާފް ސާޖަންޓް ޢަލީ ރިޔާޒް ހޭދަކުރެއްވި 16 އަހަރާއި 7 މަހާއި 17 ދުވަހުގެ ތެރޭގައި، މިނިވަން ފަންސާހުގެ މެޑަލް، ސާރކް ސަމިޓް މެޑަލް، ސިފައިންގެ ޚިދުމަތުގެ ކުލަ، ދިގު މުއްދަތެއްގައި ޚިދުމަތްކުރުމުގެ ކުލަ އަދި ހުނަރުވެރިކަމުގެ ކުލަ އާއި އަޚްލާޤީ ކުލަ 3 ވަނަ ފަހަރަށް ވެސް ވަނީ ލިބިފައެވެ.
އުމުރުން 36 އަހަރުގެ ސްޓާފް ސާޖަންޓް ޢަލީ ރިޔާޒަކީ އެމްއެންޑީއެފްގެ ތަމްރީނު މަރުކަޒުތަކުގައި ސިފައިން ތަމްރީނު ކުރުމުގައި އެތަކެއް މަސައްކަތްތަކެއް ކުރައްވާފައިވާ މުދައްރިބެކެވެ. ފުރިހަމަކޮށްފައިވާ ތަމްރީނުތައް: ސްޓާފް ސާޖަންޓް ޢަލީ ރިޔާޒް ނިޔާވިއިރު އެންސީއޯ އެކަޑަމީގައި ހިންގަމުންދިޔަ "އެންސީއޯ ކެރިއަރ ކޯސް" ދިޔައީ ފުރިހަމަ ކުރައްވަމުންނެވެ.
ސްޓާފް ސާޖަންޓް ޢަލީ ރިޔާޒް ފުރިހަމަ ކުރައްވާފައިވާ ކޯސްތަކުގެ ތެރޭގައި 43 ވަނަ އަސާސީ ތަމްރީނު ކޯސް، ސްޕެޝަލް ޓާސްކް ފޯސް ޓްރޭނިންގ (އެސްޓީއެފް)، އެންސީއޯ ކާޑަރ ކޯސް، ވެޕަން އިންސްޓްރަކްޓަރ ކޯސް، ވެޕަން އިންސްޓްރަކްޓަރ ރިފްރެޝަރ ކޯސް، ސާޖަންޓް ކޯސް ހިމެނެވެ.
މީގެ އިތުރުން އިންޑިއާއިން ޖޫނިއަރ ކޮމްބެޓް ލީޑަރ ކޯސް ވެސް ވަނީ ފުރިހަމަ ކުރައްވާފައެވެ. ސްޓާފް ސާޖަންޓް ޢަލީ ރިޔާޒް މިއަދު ނިޔާވިއިރު އަންބަކާއި 13 އަހަރުގެ ފިރިހެންކުއްޖަކު ހުއްޓެވެ.
