އީރާނުގައި ޑްރޯން އެރުވި މައްސަލައިގައި ހައްޔަރުކުރި އިނގިރޭސިވިލާތަށާއި އޮސްޓްރޭލިޔާއަށް ނިސްބަތްވާ ދެ ބޮލޮގަރުން އީރާން ސަރުކާރުން މިނިވަން ކޮށްފިއެވެ.
ޖޯލީ ކިންގް އަދި މާކް ފިރްކިން ނަމަކަށް ކިޔާ މި ދެ ބުލޮގަރުން އީރާނުން ހައްޔަރުކޮށްފައިވަނީ އޭޝިއާގެ ގައުމުތަކަށް ކުރަމުންދިޔަ ޒިޔާރަތެއްގައި މިއަހަރުގެ ކުރީކޮޅު ލައިސެންސް ނެތި އީރާނުގައި ޑްރޯން އެރުވިކަމުގެ ކުށުގައެވެ.
އީރާނުން މި ދެ ބުލޮގަރުން މިނިވަން ކޮށްފައި މިވަނީ، އޮސްޓްރޭލިއާގައި ހައްޔަރުކޮށްފައިވާ އީރާނުގެ ދަރިވަރަކު މިނިވަން ކޮށްފައި ވަނިކޮށެވެ. 2018 ވަނަ އަހަރު އީރާނުގެ މި ކިޔަވާކުއްޖާ އޮސްޓްރޭލިއާއިން ހައްޔަރުކޮށްފައިވަނީ އީރާނަށް ހަތިޔާރު ފޮނުވި ކަމުގެ ކުށުގައެވެ.
ދެ ބުލޮގަރުން އީރާނުން މިނިވަންކުރި ނަމަވެސް އީރާނުގެ ބަންދުގައި އޮސްޓުރޭލިއާއަށް ނިސްބަތްވާ އިތުރު މީހަކު އަދިވެސް އެބަހުއްޓެވެ. ކައިލީ މޯރ ގިލްބާޓް ނަމަކަށްކިޔާ މެލްބަން ޔުނިވާސިޓީގެ ލެކްޗަރާ އީރާނުން ހައްޔަރުކޮށްފައިވަނީ 2018 ވަނަ އަހަރުއެވެ.
އޮސްޓްރޭލިއާގެ ފޮރިން މިނިސްޓްރީން ބުނެފައިވަނީ ކައިލީ މޯރ ގިލްބާޓް މިނިވަންކުރުމުގެ މަޝްވަރާތައް އޮސްޓްރޭލިއާއިން ދަނީ އީރާނާއެކު ކުރަމުން ކަމަށެވެ.
