މިދިޔަ އަންގާރަ ދުވަހު އިރާގު ސަރުކާރާއި ދެކޮޅަށް އިރާގުގެ ވެރިރަށް ބަގުދާދުގައި ކުރަންފެށި މުޒާހަރާތައް މިހާރު ހަމަނުޖެހުންތަކަކަށް ބަދަލުވެ އެތައް ބައެއްގެ ފުރާނަ ގެއްލެމުންދާ މައްސަލައިގައި މިމުޒާހަރާތަކާއި ހަމަނުޖެހުންތައް ހުއްޓާލުމަށް އ.ދ އިން ގޮވާލައިފިއެވެ.
އ.ދ ގެ އެސިސްޓެންސް މިޝަން ފޯރ އިރާގުގެ ވެރިޔާ ޖެނީން ހެނީސް ވަނީ އިރާގުގައި މިހާރު ހިނގަމުންދާ ހަމަނުޖެހުންތައް ވަގުތުން ހުއްޓާލުމަށް ގޮވާލައިފައެވެ. އަދި މިހަމަނުޖެހުންތައް އެކަމަނާ ސިފަކުރައްވައިފައިވަނީ ފަސްދުވަހުގެ މަރާއި ލޭއޮހުރުމުގެ ގޮތުގައެވެ.
އަދި މިމުޒާހަރާތަކުގައި މަރުވި މީހުންގެ މަރަށް ޒިންމާވާ ފަރާތްތައް އަދާލަތުގެ ކުރިމައްޗަށް ގެނައުމަށްވެސް އެކަމަނާ ގޮވާލައިފައި ވެއެވެ.
މުޒާހަރާގެ ބައިވެރިން ބުނެފައިވަނީ މުޒާހަރާތައް ބާއްވަނީ ފެނާއި ކަރަންޓުގެ ހިދުމަތުގެ ފެންވަރު ދަށްވުމާއި ވަޒީފާގެ ފުރުސަތުތައް މަދުވުމާއި ކޮރަޕްޝަނާ ދެކޮޅަށް ނުރުހުން ފާޅު ކުރުމުގެ ގޮތުން ކަމަށެވެ.
އިރާގު ޕާލިމެންޓުގެ ހިއުމަން ރައިޓްސް ކޮމިޝަނުން ބުނި ގޮތުގައި މިދިޔަ އަންގާރަ ދުވަހު ފެށުނު މި މުޒާހަރާތަކުގައި މިހާތަނަށް 99 މީހަކު މަރުވެ، 4،000 މީހުންނަށް ވަނީ އަނިޔާވެފަ އެވެ.
