ސްޕެއިންގެ ކްލަބެއްގެ ޖޯޒީގައި ރާއްޖޭގެ އިޝްތިހާރު ޖަހަން ނިންމައިފިއެވެ.
އަންނަ މަހު ލަންޑަންގައި ފަށާ ޑަބްލިއުޓީއެމަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި މިރޭ ބޭއްވި ނޫސް ކޮންފަރެންސް އެއްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ، ރާއްޖޭގެ އިޝްތިހާރު ޖަހަނީ ސްޕެނިޝް ލީގުގެ ސެލްޓަ ވިގޯގެ ޖޯޒީ އާއި ސްޓޭޑިއަމް އަދި އެ ޓީމުގެ ޕްރެކްޓިސް ކިޓުގައި ކަމަށެވެ.
މިއެއްބަސްވުމުގައި ސޮއިކުރުން އޮންނާނީ ނޮވެމްބަރު ހަތަރު ވަނަ ދުވަހު ބާއްވާ ބައިނަލްއަގުވާމީ ނިއުސް ކޮންފަރެންސެއްގައެވެ.
ތިން އަހަރު ދުވަހަށް ކުރިއަށްގެންދާ މިއިޝްތިހާރުގެ މުޅި އެއްބަސްވުމުގެ އަގަކީ 2.9 މިލިއަން ޑޮލަރެވެ. އަހަރަކު 990،000 ޑޮލަރަށް ވުރެ ބޮޑު އަދަދެއް ދައްކަން ޖެހޭ މިޕެކޭޖްގެ ދަށުން ރާއްޖޭގެ އިޝްތިހާރުޖަހަން ނިންމާފައިވާ ސެލްޓަ ވިގޯ މިހާރު އޮތީ 11 މެޗުން ލިބުނު 9 ޕޮއިންޓާއެކު ލަލީގާ ތާވާލްގެ 18 ވަނާގައެވެ.
މީގެއިތުރުން ސްޕެއިންއަކީ ރާއްޖެއަށް ގިނަ އަދަދެއްގެ ޓޫރިސްޓުން އަންނަ ގައުމަކަށްވުމާއެކު، މިކަމުގެ ސަބަބުން ސްޕެއިން މާކެޓުން އަންނަ ޓޫރިސްޓުންގެ އަދަދު އިތުރު ވެގެންދާނެ ކަމަށް އުއްމީދު ކުރައްވާކަން މިނިސްޓަރު ފާހަގަކުރެއްވި އެވެ.
