އެފްއޭއެމްގެ ޑެޕިއުޓީ ޖެނެރއަލް ސެކްރެޓަރީއަކަށް މަޝްހޫރު ފުޓްބޯޅަ ކުޅުންތެރިޔާ ޢަލީ ޢުމަރު ހަމަޖައްސައިފިއެވެ.
ދާދިފަހަކާ ޖެހެންދެން ސްޕޯޓްސް ކޮމިޝަނަރުގެ މަޤާމުގައި ހުންނެވި ޢަލީ އުމަރު ކުއްލިގޮތަކަށް އެވަޒީފާއިން ވަކިކޮށްފައިވަނީ މިދިޔަމަހުގެ 13 ވަނަ ދުވަހުއެވެ. އެފްއޭއެމްގެ އެގްޒެކެޓިވް ކޮމިޓީގައިވެސް މަސައްކަތްކުރި ޢަލީ ޢުމަރަކީ އެފްއޭއެމްގެ ރައީސް ބައްސާމް އަދީލް ޖަލީލްގެ ވަރަށް އަރިސް ބޭފުޅެކެވެ.
ޓީވީއެމްގެ "ދިވެހި ފުޓްބޯޅަ" ޝޯވގައި އެފްއޭއެމްގެ މަޤާމަކުން ޢަލީ ޢުމަރު ފެނުމުގެ ފުރުޞަތު އޮތްކަމަށް ބައްސާމްވަނީ ވިދާޅުވެފައެވެ. ޢަލީ ޢުމަރަށް ތަޢުރީފުކޮށް އެޝޯވގައި ވާހަކަފުޅު ދައްކަވާފައިވާއިރު ޢަލީ ޢުމަރަކީ ވަރަށް ގިނަ ގޮތްގޮތުން އެހީތެރިވެދެއްވާ ބޭފުޅެއްކަމަށާއި ފުޓްބޯޅައިގެ ވަރަށް ގިނަ ކަންތަކުގައި އެކުގައި މަސައްކަތްކުރައްވާފައިވާނެކަމަށްވެސް ވިދާޅުވިއެވެ.
2019 ވަނަ އަހަރުގެ ސާފުގެ އޯޑިނަރީ ކޮންގްރެސް ނޭޕާލުގެ ކަތަމަންޑޫގައި ކުރިއަށްދިޔަރު އެފްއޭއެމްގެ ޑެޕިއުޓީ ޖެނެރަލް ސެކްރެޓަރީގެ ޙައިސިއްޔަތުން އެކޮންގްރެސްގައި ޢަލީ ޢުމަރުވަނީ ބައިވެރިވެވަޑައިގެންފައެވެ.
1999 ވަނަ އަހަރު ފުޓްބޯޅައިގެ މައިދާނަށް ނިކުތް ޢަލީ ޢުމަރު ދިވެހިންގެ ތެރެއަށް މަޝްހޫރުވެގެންދިޔައީ 2000 ވަނަ އަހަރު މާލޭގައި ބޭއްވި ގޯލްޑަން ޖުބިލީ މުބާރާތުންނެވެ. އަދިއޭގެ ފަހުން ރާއްޖޭގެ ޤައުމީ ޓީމަށް ގިނަ މެޗުތަކެއް ކުޅެދީފައިވާ ޢަލީ ޢުމަރަކީ 2008 ވަނަ އަހަރު ސާފު ޗެމްޕިއަންޝިޕް ފުޓްބޯޅަ މުބާރާތް ކާމިޔާބުކުރި އިރު މުހިންމު ދަޢުރެއްއަދާކުރި ކުޅުންތެރިއެކެވެ. އަދި 2003 ވަނަ އަހަރުގެ ސާފު ޗެމްޕިއަންޝިޕް ފުޓްބޯޅަ މުބާރާތުން ރާއްޖެ ދެވަނަ ހޯދިއިރު ރާއްޖޭގެ ޤަޢުމީ ޓީމުގައި ޢަލީ ޢުމަރު ހިމެނެއެވެ.
