ޖަމާޢަތުގައި ނަމާދު ނުކުރުމަށް ނިންމި ނިންމުމުގެ މުއްދަތު އިތުރުކުރަން އިސްލާމިކް މިނިސްޓްރީން ނިންމައިފިއެވެ.
އިސްލާމިކް މިނިސްޓްރީން ދެންމެ ކުރި ޓްވީޓެއްގައި ބުނެފައިވަނީ ކޮވިޑް 19 އާއި ގުޅިގެން ރާއްޖޭގެ ހުރިހާ ރަށެއްގެ މިސްކިތުގައި ޖަމާޢަތުގައި ނަމާދު ނުކުރާގޮތަށް ނިންމާފައި އޮތް އޮތުން 28 މޭ 2020 ވާ ބުރާސްފަތި ދުވަހުގެ އަސުރު ނަމާދުގެ ނިޔަލަށް ވަނީ އިތުރު ކުރެވިފައި ވާކަމަށެވެ.
މިއީ ކޮވިޑް-19 ފެތުރުން ކޮންޓްރޯލް ކުރުމަށް ސަރުކާރުން އަޅަމުންދާ ފިޔަވަޅު ތަކުގެ ތެރެއިން އެޅި ފިޔަވަޅެކެވެ. މިދިޔަ އެޕްރީލް މަހުގެ 19 ވަނަ ދުވަހުގެ މަޣްރިބު ނަމާދުން ފެށިގެން ރާއްޖޭގެ ހުރިހާ މިސްކިތްތަކެއް ޖަމާއަތުގައި ފަރުޟު ނަމާދުތަކާއި ހުކުރު ނަމާދު އަދި ތަރާވީހް ނަމާދު ކުރުން މެދުކަނޑާލުމަށް ސަރުކާރުން ވަނީ އަންގާފައެވެ.
ކޮވިޑް 19 އާއި ގުޅިގެން ރާއްޖޭގެ ހުރިހާ ރަށެއްގެ މިސްކިތުގައި ޖަމާޢަތުގައި ނަމާދު ނުކުރާގޮތަށް ނިންމާފައި އޮތް އޮތުން 28 މޭ 2020 ވާ ބުރާސްފަތި ދުވަހުގެ އަސުރު ނަމާދުގެ ނިޔަލަށް ވަނީ އިތުރު ކުރެވިފަ#COVID19MV #MVIaffairs
— Ministry of Islamic Affairs (@MVIaffairs) May 14, 2020
އަނެއްކާވެސް އިތުރު 14 ދުވަހަށް ޖަމާޢަތުގައި ނަމާދު ކުރުމުގެ މުއްދަތު އިތުރު ކޮށްފައިވާއިރު މާރޗު މަހުގެ 18 ން ފެށިގެން މާލެ އާއި ވިލިމާލެ އާއި ހުޅުމާލޭގެ މިސްކިތްތަކުގައި ޖަމާއަތުގައި ނަމާދު ކުރުން ވަނީ މެދުކަނޑާލައިފަ އެވެ.
ރާއްޖެއެކޭ އެއްގޮތަށް ގިނަ އިސްލާމީ ގައުމުތަކުގައި މި ރޯދަ މަހުވެސް ޖަމާޢަތުގައި ނަމާދުކުރުން ވަނީ މެދު ކަނޑާލައިފައެވެ. އެގޮތުން ސައުދީއަރަބިއްޔާ އާއި މިސްރު އަދި އިންޑޮނޭޝިއާ ފަދަ މުސްލިމް ބޮޑެތި އާބާދީތައް އޮންނަ ގައުމުތަކުގައިވެސް ޖަމާއަތުގައި ނަމާދު ކުރުންވަނީ މެދު ކަނޑާލައިފައެވެ.
