ބުރެޒިލުގެ ރައީސް ޖައިރް ބޮލްސޮނޯރޯ އާންމުން އެއްވެ އުޅޭ ތަންތަނަށް ނިކުމެ އުޅޭ އިރު ފޭސް މާސްކް އެޅުމަށް އެގައުމުގެ ގާޒީއަކު އަމުރު ކޮށްފިއެވެ.
ބުރެޒިލުގެ ރައީސް ބޮލްސޮނޯރޯ އަކީ ކޮވިޑް-19 އާއި ގުޅިގެން ބުރެޒިލުގެ ޑިސްޓުރިކްތަކުން އަޅަމުންދާ ރައްކާތެރިކަމުގެ ފިޔަވަޅުތަކާއި ދެކޮޅަށް ވަރަށް ބޮޑަށް ވަކާލާތު ކުރައްވާ ބޭފުޅެކެވެ.
މިގޮތުން ކޮވިޑް-19ގެ ކުރީކޮޅު ބުރެޒިލުގައި އިއުލާން ކޮށްފައިވާ ފުރަބަންދާއި ދެކޮޅަށް ބޮލްސޮނޯރޯ އިސްވެހުރެވަނީ މުޒާހަރާތައްވެސް ބާއްވައިފައެވެ. މި މުޒާހަރާތަކުގައި ބޮލްސޮނޯރޯ ބައިވެރިވެ ވަޑައިގެންފައިވަނީވެސް މާސްކް ނާޅައެވެ.
ބުރެޒިލުގެ ވެރިކަންކުރާ ރަށް ބުރެސީލިއާ އާއި އަދި އެރަށުގެ ވަށައިގެންވާ ސަރަހައްދުތަކުގައި މީހުން ބޭރަށް ނިކުމެ އުޅޭއިރު މާސްކު އެޅުމަށް އަމުރު ނެރެފައިވަނީ އޭޕްރީލްމަހުގެ30 ވަނަ ދުވަހެވެ. ނަމަވެސް މިއަމުރަށް ގިނަ ބަޔަކު ތަބާވަމުން ނުދިއުމާއި ގުޅިގެން މާސްކް ނާޅާ ފަރާތްތަކާއި ދެކޮޅަށް ހަރުކަށި ފިޔަވަޅުތައް އެޅުމަށް އެ ޑިސްޓުރިކްޓުގެ ގަވަރުނަރުވަނީ ނިންމަވައިފައެވެ.
މިގޮތުން ފޭސް މާސްކް ނާޅާ އުޅޭ ފަރާތްތަކުން ދުވާލެއްގެ މައްޗަށް 387 އެމެރިކާ ޑޮލަރު ދޭންޖެހޭނެ ގޮތަށް މެއި 11 ވަނަ ދުވަހުން ފެށިގެންވަނީ ނިންމައިފައެވެ.
ބުރެޒިލް މިވަގުތު ފާހަގަ ކޮށްލެވެނީ ކޮވިޑް-19ގެ ނުރައްކާ އެންމެ ބޮޑު ގައުމުތަކުގެ ގޮތުގައެވެ. މިގޮތުން މިހާތަނަށް ބުރެޒިލުން 1,113,606 މީހުންވަނީ މިބައްޔަށް ޕޮޒިޓިވުވެ 51,407 މީހުން މިބަލީގައި މަރުވެފައެވެ.
