ފެށުން ބަދިގެތެރޭން މިފަހަރު މި ގެނެސްދެނީ ތަންދޫރީ ސޭންޑްވިޗް ތައްޔާރުކުރާނެގޮތެވެ.
ބޭނުންވާ ތަކެތި:
- 300ގ ކުކުޅު ( ބޯންލެސް)
- 1 ޖޯޑު ޔޯގަޓު
- 1 ސައިސަމުސާ ލުނބޯ ހުތް
- 2 ސައިސަމުސާ މިރުސް ހަވާދު ( ކުކުޅު ހަވާދު ވެސް ބޭނުންކުރެވިދާނެ)
- 3 މޭޒުމަތީ ސަމުސާ ކައްކާ ތެޔޮ
- ޗީސް ( މޮޒަރެއްލާ)
- ޕާން
- މަޔޮނައިސް
- 2 ފޮތި ފިޔާ
- 2 ފޮތި ކިއުކަމްބަރ
- 2 ފޮތި ރޯ ޓޮމާތޯ
ތައްޔާރުކުރާނެގޮތް:
ފުރަތަމަ ބޮޑު ތައްޓެއްގެ ތެރެއަށް ކުކުޅުކޮޅު އަޅާލާށެވެ. ދެން އޭގެތެރެއަށް ޔޯގަޓާއި، ލުނބޯ ހުތާއި އަދި މިރުސް ހަވާދު ކޮޅު އަޅާލުމަށްފަހު ސަމުސަލަކުން ރަނގަޅަށް އެއްވަންދެން ހާކާށެވެ. ރަނގަޅަށް އެއްވުމުން 3 މިނެޓް ވަންދެން އެއްކުރި ކުކުޅުކޮޅު ތަށީގައި ބަހައްޓާލާށެވެ. ދެން އެއަށްފަހު، ގޭސްއުނދުންމަތީ ތަވަޔަށް ތެޔޮ އެޅުމަށްފަހު އެއްކުރި ކުކުޅު ކޮޅު އޭގެތެރެއަށް އަޅާލާށެވެ. ދެން ތަވާގައި މަތިޖެހުމަށްފަހު ކުކުޅުކޮޅު ރަނގަޅަށް ރޯ ފިލަންދެން ކައްކާލާށެވެ. އެ ތައްޔާރުކުރެވުނީ ތަންދޫރީ ޗިކަންއެވެ.
އެއަށްފަހު ޕާންފޮތިތަކުގެ ކައިރިމަތި އެއްވަރަށް ކަފާލުމަށްފަހު ޕާންފޮތީގައި މަޔޮނައިސް ހާކާލާށެވެ. ދެން ޕާންފޮތީގެ މައްޗަށް ތަންދޫރީ ޗިކަން ކޮޅު އަޅާލާށެވެ. އެއަށްފަހު އޭގެ މައްޗަށް ޗީސް ގާނާށެވެ. ދެން އޭގެ މަތީގައި ފިޔާ ފޮއްޗާއި، ކިއުކަމްބާ އަދި ޓޮމާތޯ ފޮތިތައް އަތުރާލުމަށްފަހު، އަނެއް ޕާންފޮތީގައި މަޔޮނައިސް ހޭކުމަށްފަހު ދެ ޕާންފޮތި ތަތްކޮށްލާށެވެ. ދެން އެއަށްފަހު ސޭންޑްވިޗް، ގޭސްއުނދުން މަތީ ނުވަތް ޓޯސްޓަރ އެއްގައި ފިހެލާށެވެ. މިހާރު ތި ތައްޔާރުކުރެވުނި ތަންދޫރީ ސޭންޑްވިޗެވެ.
