ރެކްޓާ މިންގަނޑުން 7.2 ގެ ބާރު މިނުގައި ހައިޓީއަށް އިއްޔެ އައި ބާރުގަދަ ބިންހެލުމެއްގައި 304 މީހުން މަރުވެ، 1800 މީހުން ޒަހަމްވެއްޖެއެވެ.
ބީބީސީ ނޫހުން ރިޕޯޓުކުރި ގޮތުގައި، އިއްޔެ ހެނދުނު ހައިޓީގެ ހުޅަނގަށް އައި މި ބާރުގަދަ ބިންހެލުމުގައި ބޮޑެތި އިމާރާތްތައް ވެއްޓި ގިނަ ގެއްލުންތަކެއް ވަނީ ލިބިފައެވެ. އަދި ގިނަ ގިނަ ބަޔަކު ވަނީ އެ އިމާރާތްތައް ދަށުވެފައެވެ. މި ހާދިސާގައި 1800 މީހުން ޒަހަމްވެފައިވާއިރު، އިމާރާތްތައް ދަށުވެފައިވާ މީހުން ސަލާމަތްކުރުމުގެ މަސައްކަތް އަދިވެސް ދަނީ ކުރަމުންނެވެ.
ހައިޓީގެ ބޮޑު ވަޒީރު ވަނީ، މި ބިންހެލުމުގެ ސަބަބުން ލިބުނު ބޮޑެތި ގެއްލުންތަކުގެ ސަބަބުން 1 މަސް ދުވަހުގެ މުއްދަތަށް ސްޓޭޓް އޮފް އެމާޖެންސީ އިއުލާންކޮށްފައެވެ.
މި ބިންހެލުން އައީ އިއްޔެ ހެނދުނު އެގައުމުގެ ސެއިންޓް ލުއީ ޑު ސޫޑްއާ 12 ކިލޯމީޓަރު ދުރުން، 10 ކިލޯމީޓަރު އަޑިއަށް ކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް)އިން ރިޕޯޓު ކޮށްފައިވެއެވެ. ނަމަވެސް އެ ބިންހެލުމުގެ އަސަރު، އެ ޓައުންގެ 125 ކިލޯމީޓަރު ދުރުގައި އޮންނަ ވެރިރަށް ޕޯޓް އޯ ޕްރިންސް އާއި އަވަށްޓެރި ގައުމުތަކަށްވެސް ވަނީ ފޯރައިފައެވެ.
Je viens de survoler, à basse altitude, la ville des #Cayes pour prendre connaissance de l’étendue des dégâts en vue de mieux canaliser les interventions d’urgence.#Haïti pic.twitter.com/QmYAgRhkQz
— Dr Ariel Henry (@DrArielHenry) August 14, 2021
ހައިޓީއަށް މި ބާރުގަދަ ބިންހެލުން އައިސްފައި މިވަނީ ، 2010 ވަނަ އަހަރު އައި ބޮޑު ބިންހެލުމުގެ ސަބަބުން ހައިޓީއަށް ލިބުނު ގެއްލުންތަކުން އަދިވެސް އަރައިނުގަނެވި އުޅެނިކޮށެވެ. އެ ފަހަރުގެ ބިންހެލުމުގައި 200000 މީހުންގެ ފުރާނަ ގެއްލި، ހައިޓީގެ އިގްތިސާދަށް ބޮޑެތި ގެއްލުންތަކެއް ލިބުނެވެ.
މި ބިންހެލުމުގެ ސަބަބުން ގިނަ ބައެއްގެ ގެދޮރު ހާލާކުވެ، ގިނަ ބަޔަކު މަރުވެފައިވާއިރު، އަދިވެސް ގިނަ ބަޔަކަށް އަންނަނީ ހޮސްޕިޓަލުގައި ފަރުވާދެމުންނެވެ.
