ބޮޑު ހިޔާނާތެއްގެ މައްސަލަލައިގައި ޖަލަށް ލުމަށް ހުކުމް ކޮށްފައިވާ އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރު، އަބްދުﷲ ޒިޔަތު ގޭބަންދަށް ބަދަލުކޮށްފިއެވެ
ޒިޔަތު ގޭބަންދަށް ބަދަލުކޮށްފައިވަނީ ކޯޓުއަމުރަކާ ނުލައި، ހޯމް މިނިސްޓްރީގެ ނިންމުމަކުން ކަމަށް މަޢުލޫމާތު ލިބިފައިވެއެވެ. މި އުޞޫލުން ޒިޔަތު ގޭބަންދަށް ބަދަލުކުރިއިރު، ޅ. މާބިންހުރާގެ އިކުއިޒިޝަން ކޮސްޓްގެ ގޮތުގައި އެމްއެމްޕީއާރުސީއަށް ދެއްކި ފަސް މިލިއަން ޑޮލަރަށް ހިޔާނާތްތެރިވި ދައުވާ ސާބިތުވެ މިހާރު ޒިޔަތު ގެންދަވަނީ އަށް އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އަދި އެ މައްސަލާގެ އިސްތިއުނާފު ހައިކޯޓުގައި ވެސް ކުރިއަށް ގެންގޮސްފައިވާއިރު އެ ކޯޓުން ވެސް ހުކުމް ކޮށްފައިވަނީ ކްރިމިނަލް ކޯޓުގެ ހުކުމް ރަނގަޅު ކަމަށެވެ.
މީގެ އިތުރުން އެމްއެމްޕީއާރްސީގެ ބޮޑު ހިޔާނާތާ ގުޅިގެން ޒިޔަތުގެ މައްޗަށް އިތުރު 30 ދައުވާއެއް އުފުލާފައިވާއިރު، އެ ދައުވާގެ ޝަރީއަތް ވެސް ކުރިމިނަލް ކޯޓުގައި ކުރިއަށްދެ އެވެ.
ޒިޔަތު ގޭބަންދަށް ބަދަލުކުރިއިރު، އެމްއެމްޕީއާރުސީގެ މައްސަލައިގައި އެންމެ ބޮޑު ތުހުމަތެއް ކުރެވޭ، މިވަގުތު ޖަލު ބަންދުގައި ހުރި ކުރީގެ ނައިބު ރައީސް އަޙްމަދު އަދީބުގެ އާއިލާއިން ތަކުރާރުކޮށް އެދުމުންދާއިރުވެސް އަދީބު ގޭބަންދަށް ބަދަލު ކުރުމަށް ހޯމް މިނިސްޓަރީން އަންނަނީ އިންކާރު ކުރަމުންނެވެ.
އަދީބު ގޭބަންދަށް ބަދަލު ކުރުމަށް ސަރުކާރުން އިންކާރު ކޮށްފައިވާއިރު، އަދީބުގެ ޞިއްޙީ ހާލަތަށް ރިއާޔަތް ކުރުމަށްފަހު އަދީބު ގޭބަންދަށް ބަދަލުކުރުމަށް ދިވެހިރާއްޖެ ހައި ކޯޓުން އަމުރު ކުރުމުން ސަރުކާރުން އެ އަމުރު ސްޕްރީމް ކޯޓުގައި އިސްތިއުނާފު ކުރިއެވެ. ނަތީޖާއެއްގެ ގޮތުން ސްޕްރީމް ކޯޓުން ވަނީ ހައިކޯޓުގެ އަމުރު ބާތިލް ކޮށްފައެވެ.
ޖަލުތަކުގައި އަނިޔާތައް ދޭކަމަށާއި، ގައިދީންގެ ބޭސްފަރުވާގެ ކަންކަމުގައި ވަރަށް ބޮޑަށް ވަކާލާތު ކުރަމުން ވެރިކަމަށް އައި މި ސަރުކާރުން އަމަލުކުރާ ގޮތުން މި ސަރުކާރަށްވެސް ބައެއް ސިޔާސީ ޕާޓީތަކުން ގެންދަނީ ފާޑުކިޔަމުންނެވެ.
