ދުންފަތުގެ އިސްތިއުމާލުކުރުން އެއްކޮށް ހުއްޓަލާ ރަށްރަށުގެ އާބާދީގެ ހުރިހާ ރައްޔިތުންނަށް ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭގޮތުން އާންމުންގެ ޚިޔާލު ހޯދުމަށް ސިއްހީ ވުޒާރާއިން ދިރާސާއެއް ފަށައިފިއެވެ.
ސިއްހީ ވުޒާރާއިން މަޢުލޫމާތު ދެއްވިގޮތުގައި، މި ދިރާސާގެ މައިގަނޑު މަޤްސަދަކީ ދުންފަތުގެ އިސްތިއުމާލުކުރުން އެއްކޮށް ހުއްޓަލާ ރަށްރަށުގެ އާބާދީގެ އެންމެނަށް ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭގޮތުން އާންމުންގެ ޚިޔާލު ހޯދުމެވެ. މީގެ އިތުރުން މުޖުތަމައު ހޭލުންތެރިކުރުމާއި، ކަންކަން ތަންފީޛު ކުރުމުގައި ދިމާވާ ގޮންޖެހުންތަކާމެދު އާންމުން ދެކޭގޮތް ދެނެގަތުމަށްވެސް މި ދިރާސާއިން މަސައްކަތްކުރާނެއެވެ.
ދިރާސާގައި ބައިވެރިވާ ފަރާތްތަކުގެ މަޢުލޫމާތު ސިއްރު ހިފެހެއްޓޭނެކަމަށް ސިއްހީ ވުޒާރާއިން ވަނީ ޔަގީންކަން ދެއްވާފައެވެ. އަދި ދިރާސާއިން ލިބޭ މަޢުލޫމާތުތައް ބޭނުންކުރާނީ ހަމައެކަނި ރާއްޖޭގައި ދުންފަތުގެ އިސްތިޢުމާލު ކުރުން މަދުކުރުމަށް ކުރެވޭ މަސައްކަތްތަކާއި އެކަމާ ގުޅުންހުރި ސިޔާސަތުތައް އެކުލަވާލުމުގައި ކަމަށް ވިދާޅުވެފައިވެއެވެ.
ރައީސުލްޖުމްހޫރިއްޔާގެ އިރުޝާދުގެ ދަށުން، ދުނިޔޭގެ ސިއްޙަތު ޖަމްޢިއްޔާގެ އެހީތެރިކަމާއެކު 5 އަހަރުގެ މާސްޓަރ ޕްލޭނެއް އެކުލަވާލުމުގެ މަސައްކަތް ދަނީ ކުރެވެމުންނެވެ. މި ޕްލޭންގައި، ދުންފަތާ ދުރު މުޖުތަމަޢުއެއް ބިނާކުރުމަށްޓަކައި އިޖުތިމާޢީ ގޮތުން ހަރަކާތްތެރިވާ ފަރާތްތަކަށާއި، ދުންފަތުގެ އިސްތިޢުމާލުނުކުރާ ރަށްރަށަށް އިނާމު ދިނުމުގެ އިތުރުން، އެފަދަ ރަށްރަށުގެ އިޖްތިމާޢީ ކަންކަމަށް މާލީ އެހީތެރިކަން ފޯރުކޮށްދިނުން ހިމެނެއެވެ.
ސަރުކާރުން ދުންފަތް ކޮންޓްރޯލްކުރުމަށް އަޅުއްވާފައިވާ ފިޔަވަޅުތަކުގެ ތެރޭގައި، ވޭޕް އެތެރެކުރުން މަނާކުރުމާއި، ދުންފަތުގެ ބާވަތްތަކުގެ ޑިއުޓީ ބޮޑުކުރުން ހިމެނެއެވެ. އަދި 2007 ވަނަ އަހަރުން ފެށިގެން އުފަންވާ ދިވެހި ރައްޔިތުންނަށް ދުންފަތުގެ އިސްތިޢުމާލުކުރުމާއި ގަނެވިއްކުން މަނާކުރުންފަދަ މުހިންމު ފިޔަވަޅުތައް ވަނީ އަޅުއްވާފައެވެ.
