ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާ ބެހޭ ގަވައިދާ ހިލާފަށް ވަކިން ސިނގިރޭޓް ވިއްކި 28 ތަނެއް މިހާތަނަށް ޖޫރިމަނާކޮށްފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ހާމަކޮށްފިއެވެ.
މިގޮތުން އެޗްޕީއޭ އިން ކުރިއަށްގެންދިޔަ އިންސްޕެކްޝަނެއްގައި ޖޫރިމަނާކޮށްފައިވަނީ ވަކިން ސިނގިރޭޓް ވިއްކާ 11 ފިހާރައަކާއި 17 ކެފޭ ރެސްޓޯރެންޓެވެ.
މިދިޔަ މޭ މަހު އަމަލުކުރަން ފެށި ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާއި ބެހޭ ޤަވައިދު ބުނާގޮތުން ރާއްޖޭގައި ވިއްކޭނީ މަދުވެގެން 20 ސިނގިރޭޓް ހިމެނޭ ފޮއްޓެވެ. ބިޑިނަމަ ވިއްކޭނީ މަދުވެގެން 50 ބިޑި ހިމެނޭ ފޮށި ނުވަތަ ބޮނޑިއެވެ. އަދި ދުންފަތުގެ އެހެން ބާވަތްތައް ވިއްކާނަމަ ވިއްކަންޖެހޭނީ މަދުވެގެން 30 ގްރާމް ހުންނަ ބާވަތްތަކެވެ.
އެޗްޕީއޭ އިން 28 ތަނެއް ޖޫރިމަނާކުރިކަން ހާމަކޮށްފައި މިވަނީ ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާ ބެހޭ ގަވައިދާ އެއްގޮތަށް ވަކިން ސިނގިރޭޓު ވިއްކަމުން ނުދާކަން ޔަގީންކުރުމަށްޓަކައި ހާއްސަ އޮޕަރޭޝަނެއް ކުރިއަށް ގެންދާނެކަން މިމަހުގެ ފުރަތަމަ ދުވަހު ހާމަކުރުމަށް ފަހުގައެވެ.
ދުންފަތުގެ އިސްތިއުމާލު ކުރުމާއި ގުޅިގެން ޖެހޭ ބަލިތައް ދިވެހިރާއްޖޭގައި އިތުރުވަމުން އަންނަކަން ތަފާސް ހިސާބުތަކުން ދައްކައެވެ. މިކަމާއި ގުޅިގެން އެޗްޕީއޭ އިން ދަނީ ދުންފަތުގެ އިސްތިއުމާލުކުރުން މަދުކުރުމުގެ އެކިއެކި ޕްރޮގްރާމްތައް ހިނގަމުންނެވެ.
