އެފްރިކާ ކަޕް އޮފް ނޭޝަންސްގެ ގަދަ 16 ގައި ޒާހާގެ ލަނޑުން މާލީ ބަލިކޮށް އައިވަރީ ކޯސްޓް މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.
1-0 ގެ ނަތީޖާއަކުން އައިވަރީ ކޯސްޓް ކާމިޔާބުކުރި މިމެޗުގެ ހަމައެކަނި ލަނޑު މެޗުގެ 76 ވަނަ މިނަޓްގައި ކާމިޔާބުކޮށްދިނީ ވިލްފްރެޑް ޒާހާއެވެ.
އައިވަރީ ކޯސްޓް ހާފުގެ މެދަކާ ހިސާބުން ފޮނުވާލި ހިލޭ ޖެހުމެއް އެއްވެސް ކުޅުންތެރިއެއްގެ ގައިގަ ނުޖެހި ގޯލް ކުރިމަތިން ހުރަސްވަނިކޮށް ޒާހާ އަރާ ޖެހީ ބޯޅަ ހޯދަށް އެރި ކީޕަރަށް ދިފާޢުކުރުމުގެ ފުރުޞަތު ނުދީއެވެ.
މާލީގެ ފަރާތުން ވަރުގަދަ ކުޅުމެއް ފެނިގެން ދިޔަ މިމެޗުގައި ސުން ކަނޑުވަން ލިބުނު ފުރުޞަތުގެ ބޭނުންވަނީ ހިފޭގޮތްނުވެފައެވެ. އެގޮތުން މޯސާ މަރެގާއަށާއި މޯސާ ޖެނެޕޯއަށް ލިބުނު ދެފުރުޞަތު ފާހަގަކޮށްލެވެއެވެ.
ފިޒިކަލް ގޭމެއް ފެނިގެންދިޔަ މިމެޗުން ގިނަ އަދަދެއްގެ ފައުލްތަކެއްވެސްވަނީ ފެނިގެން ގޮސްފައެވެ.
އައިވަރީ ކޯސްޓް މިމުބާރާތް ދެފަހަރެއްގެ މަތިން ކާމިޔާބުކޮށްފައިވެއެވެ. 1992 އަދި 2015 ގައެވެ.
ރޭގެ މެޗުން ބަލިވެ މާލީ މުބާރާތުން ވަކިވިނަމަވެސް މާލީގެ ޒުވާން ޤައުމީޓީމުގެ ފަރާތުން މުބާރާތުގައި މޮޅު ކުޅުމެއްވަނީ ފެނިގެން ގޮސްފައެވެ. މާލީއަކީ މިމުބާރާތުގައި ބައިވެރިވި ދެވަނައަށް އެންމެ ޒުވާން ޓީމެވެ.
ކުއާޓާ ފައިނަލްގައި އައިވަރީ ކޯސްޓް ބައްދަލުކުރަންޖެހޭނީ އަލްޖީރިއާއާއެވެ.
