އެފްރިކާ ކަޕް އޮފް ނޭޝަންސްގައި ރޭ ކުޅެވުނު ސެމީ ފައިނަލް މެޗުގައި މެޗުގެ އިތުރު ވަގުތުގައި މަހްރޭޒް ކާމިޔާބުކޮށްދިން ހިލޭ ޖެހުމަކުން އަލްޖީރިއާ ފައިނަލަށް ދަތުރުކޮށްފިއެވެ.
ނައިޖީރިއާ އާއި ބައްދަލުކުރި މިމެޗު އަލްޖީރިއާ ކާމިޔާބުކުރީ 2-1 ގެ ނަތީޖާއަކުންނެވެ.
މެޗުގައި ފެނިގެން ދިޔަ ފުރަތަމަ ލަނޑަކީ ނައިޖީރިއާގެ ޓްރޫސްކް އީކޮންގެ އަތުން ބައިކޮޅަށް ވަތް ލަނޑެކެވެ. މިލަނޑާއެކު ފުރަތަމަ ހާފު ނިމިގެންދިޔައީ އަލްޖީރިއާ ކުރީގައި އޮވެގެންނެވެ.
ދެޓީމުގެ ފަރާތުންވެސް ވަރަށް ހަމަހަމަ ކުޅުމެއް ފެނިގެންދިޔަ މިމެޗުގައި ނައިޖީރިއާއިން ނަތީޖާ ހަމަހަމަކުރީ ލިބުނު ޕެނަލްޓީއަކުން މެޗުގެ 72 ވަނަ މިނަޓްގައެވެ. ވީއޭއާރު ބެލުމަށް ދިން މިޕެނަލްޓީ އެޓީމަށް ކާމިޔާބުކޮށްދިނީ އިގާލޯއެވެ.
މިއީ މިމުބާރާތުގައި އަލްޖީރިއާ ކޮޅަށް ވަތް ދެވަނަ ލަނޑެވެ.
ދެޓީމު ހަމަހަމަ ވެގެން މެޗު ނިމެންދަނިކޮށް މެޗުގެ އިތުރު ވަގުތުގައި ލިބުނު ހިލޭ ޖެހުމަކުން މެންޗެސްޓާ ސިޓީއަށް ކުޅެމުން އަލްޖީރިއާގެ މަހްރޭޒް ޖެހި ހިތްގައިމު ލަނޑަކާއެކު މެޗު ނިމުނީ އަލްޖީރިއާ ކުރީގައި އޮވެގެންނެވެ.
ފައިނަލްގައި އަލްޖީރިއާ ބައްދަލުކުރަން ޖެހޭނީ ސެނެގޯލްއާއެވެ. މިފޯރިގަދަ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހުކުރު ދުވަހުގެ ރޭ 12:00 ގައެވެ.
