އެފްރިކާ ކަޕް އޮފް ނޭޝަންސްގައި ރޭ ޓިއުނީޝިއާއާއި ދެކޮޅަށް ކުޅެވުނު ތިންވަނަ ހޮވާ މެޗު ނައިޖީރިއާ ކާމިޔާބުކޮށްފިއެވެ.
1-0 ގެ ނަތީޖާއަކުން ނައިޖީރިއާ ކާމިޔާބުކުރި މިމެޗުގެ ހަމައެކަނި ލަނޑު ފެނިގެން ގޮސްފައިވަނީ މެޗުގެ ވަރަށް ކުރީކޮޅުއެވެ.
3 ވަނަ މިނަޓްގައި ނައިޖީރިއާއިން ޖެހި މިލަނޑު އެޓީމަށް ކާމިޔާބުކޮށްދިނީ ޝެންހާއި ޝެންހުއާއަށް ކުޅެމުން އަންނަ އެޓީމުގެ ޖާޒީ ނަންބަރު 9 އޯޑިން އިގާލޯއެވެ.
ޓިއުނީޝިއާ ކީޕަރު ދިފާޢުކުރި ބޯޅި އެޓީމުގެ ޑިފެންޑަރު ފައިގައިޖެހި ލިބުނީ އޭރިއާތެރޭ ހުސްކޮށްހުރި އިގާލޯއަށެވެ. ލިބުނު ފުރުޞަތުގެ ބޭނުންހިފައި އޭނާ ޖެހި މިލަނޑާއެކު ނައިޖީރިއާއަށް ލީޑު ލިބިގެންދިޔައެވެ. އިގާލޯގެ މިލަނޑަކަީ މިމުބާރާތުގައި އޭނާ ޖެހި ފަސް ވަނަ ލަނޑެވެ.
މުބާރާތުގެ އެންމެ ގިނަ ލަނޑުޖެހު ކުޅުންތެރިންގެ ލިސްޓްގައި ފަސް ލަނޑާއެކު އިގާލޯ އޮތްއިރު ދެވަނަގައި އޮތް ހިމެނޭ ކުޅުންތެރިންނަށް ކާމިޔާބުކޮށްދެވިފައިވަނީ ތިން ލަނޑެވެ. މިލިސްޓްގައި ސަޑިއޯ މާނޭވެސް ހިމެނެއެވެ. ޖެހި ލަނޑުގެ އަދަދު އިތުރުކުރަން މާނޭއަށް އަދި އެއް މެޗު އެބައޮތެވެ. އެއީ މުބާރާތުގެ ފައިނަލެވެ.
ރޭގެ މެޗުގައި ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންގޮސްފައިވާއިރު ޓިއުނީޝިއާއަށްވެސް ލަނޑު ޖަހާނެ ހުސް ދެފުރުޞަތެއް ލިބިގެންދިޔައެވެ. ނަމަވެސް މިއިން އެއްވެސް ހަމަލާއެއް ގޯލާއި އަމާޒުކުރެވޭގޮތްވަނީ ނުވެފައެވެ.
މީގެ އިތުރުން ޓިއުނީޝިއާ ކީޕަރުގެ ފަރާތުން މޮޅު ދެ ސޭވެއްގެ ރޭ މެޗުންވަނީ ފެނިގެން ގޮސްފައެވެ.
މިމުބާރާތުގެ ފައިނަލުގައި ސެނެގޯލް އަދި އަލްޖީރިއާ ބައްދަލުކުރާއިރު، މިފޯރިގަދަ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހުކުރު ދުވަހުގެ ރޭ 12:00 ގައެވެ
