އެފްރިކާ ކަޕް އޮފް ނޭޝަންސްގައި ރޭ ސެނެގޯލްއާއި ދެކޮޅަށް ކުޅުނު ފައިނަލް މެޗުގައި މެޗުގެ ވަރަށް ކުރީކޮޅު ޖެހި ލަނޑާއެކު ސެނެގޯލް ބަލިކޮށް އަލްޖީރިއާ 29 އަހަރަށްފަހު އެފްރިކާގެ ރަސްކަމަށް އެނބުރި އައިސްފިއެވެ.
އެންމެ ލަނޑެއް ފެނިގެންދިޔަ މިމެޗުގައި އަލްޖީރިއާއިން ލަނޑު ޖަހާފައިވަނީ މެޗުގެ ދެވަނަ މިނަޓްގައެވެ. މިލަނޑަކީ ސެނެގޯލްގެ ޑިފެންޑަރު ސާނޭ ގައިގައި ޖެހި މިސްރާބު ބަދަލުވެގެން ވަތް ލަނޑެކެވެ.
79 ވަނަ ސިކުންތުގައި ފެނިގެންދިޔަ މިލަނޑަކީ މިމުބާރާތުގައު ފެނިގެންދިޔަ އެންމެ އަވަސް ލަނޑެވެ.
އަލްޖީރިއާ މީގެ ކުރިން މިމުބާރާތުގެ ކާމިޔާބުކޮށްފައިވަނީ މީގެ 29 އަހަރު ކުރިންނެވެ. 1990 ވަނަ އަހަރު އެޤައުމުގައި ބޭއްވުނު މުބާރާތް އެފަހަރުގެ އަލްޖީރިއާ ކާމިޔާބުކުރީ ފައިނަލްގައި ނައިޖީރިއާ ބައްދަލުކޮށް 1-0 ގެ ނަތީޖާއަކުންނެވެ.
މިސްރުގެ ވެރިރަށް ކައިރޯގައި ރޭ ކުޅުނު މެޗު ސެނެގޯލް ކުޅެފައިވަނީ ސަސްޕެޝަނުގެ ސަބަބުން އެޓީމުގެ އިތުބާރު ޑިފެންޑަރު ކަލިދޫ ކުލިބާލީ ނުލައެވެ. ރޭގެ މެޗުގައި ރެފްރީ ސެނެގޯލަށް ދިން ޕެނަލްޓީ ވީއޭއާރު ބެލުމަށްފަހުވަނީ ޕެނަލްޓީއެއް ނޫންކަމަށް ނިންމާފައެވެ.
މީގެއިތުރުންވެސް ނަތީޖާ ހަމަހަމަކުރަން ރީތި ހުސް ދެފުރުޞަތެއް ސެނެގޯލަށް ލިބިގެންދިޔައިރު، އެމްބާއޭ ނިޔާން އާއި އިސްމާއިލް ސާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.
"އަހަރެމެން ވަރަށް ދިގު އިންތިޒާރެއް ކޮށްފިން. މިއަދު އެކަން ހާމަނުކުރެވުނު ނަމަވެސް މިިހުރީ ވަރަށް އުފަލުން." އަލްޖީރިއާއަށް ކުރިން ކުޅެދިން އަދި މިހާރު ކޯޗަކަށްހުރި ޖަމެލް ބެލްމާދީ ބުންޏެވެ.
