ކުޑަކުދިންނަށް ޖިންސީ ގޯނާ ކުރި ތުޙުމަތުގައި ޙައްޔަރުކުރި ރާއްޖޭގެ ޤައުމީ ކުރިކެޓް ޓީމުގެ ކޯޗް އާސިފް ހާން ދޫކޮށްލައިފިއެވެ.
ފުރަންވެގެން ވެލާނާ އިންޓަނޭޝަނަލް އެއާޕޯޓުގައި ހުއްޓާ ޙައްޔަރުކުރި، ކޯޗު ދޫކޮށްލާފައިވަނީ 24 ގަޑިއިރުގެ ތެރޭގައި ކޯޓަށް ހާޟިރު ނުކުރެވުމުންކަމަށްވެސް މަޢުލޫމާތު ލިބެއެވެ.
ކޯޗުގެ މައްސަލަ ފުލުހުން ތަޙުޤީޤުކުރަމުންދާކަމަށް އިއްޔެ ވިދާޅުވެފައިވާއިރު، އޭނާ ހިފަހައްޓާފައިވަނީ 18 އަހަރުން ދަށުގެ ކުދިންނާއި، އަދި 18 އަހަރުން މަތީގެ ބަޔަކާއި ޖިންސީ ފުރައްސާރަ ކުރިކަމުގެ ތުހުމަތުގައި ކަމަށްވެސް ފުލުހުން ވަނީ ވިދާޅުވެފައެވެ.
ޕާކިސްތާނާއި އެފްރިކާއަށް ނިސްބަތްވާ އުމުރުން 46 އަހަރުގެ އާސިފް ޙާން ޤައުމީ ކްރިކެޓް ޓީމުގެ ކޯޗުކަމާއި ހަވާލުވެފައި ވަނީ މިދިޔަ އަހަރު ތެރޭގައެވެ.
ކޯޗު އާސިފް ޙާންގެ މިހަޑިހުތުރު ޢަމަލާއި ގުޅިގެން ދިވެހި އަންހެން އަދި ފިރިހެން ކްރިކެޓް ކުޅުންތެރިންގެ ފަރާތުން ނެރެފައިވާ ބަޔާނުގައި ބުނެފައި ވަނީ، ކޯޗުގެ މައްސަލައިގެ ޙަޤީޤަތް ނުބަލައި އޭނާ ރާއްޖެއިން ފުރުވާލަން ކްރިކެޓް ބޯޑުން މަސައްކަތްކޮށްފައިވާ ކަމަށާއި، ޒުވާން ކްރިކެޓް ކުޅުންތެރިންނަށް އެކި ފަހަރު މަތިން އާސިފް ޖިންސީ ގޯނާކޮށްފައިވާކަން ތުހުމަތުކުރެވޭއިރު އޭގެ ތެރޭގައި ގިނައީ 18 އަހަރު ނުފުރޭ ކުޅުންތެރިން ކަމަށެވެ.
އަދި ކޯޗު އާސިފް ޙާން މިމައްސަލަތައް ކަމާބެހޭ މުއައްސަސާތަކަށް ހުށަނާޅައި، ކްރިކެޓް ބޯޑުން އޭނާ ފުރުވާލަން އުޅުނު މައްސަލަ ހަރުކަށިކޮށް ކުށްވެރި ކުރާކަމަށްވެސް ކުޅުންތެރިންގެ ފަރާތުން ނެރުނު ބަޔާނުގައިވެއެވެ.
މިމައްސަލައާއި ގުޅިގެން ފުލުހުން ވިދާޅުވީ، ކުޑަކުދިންނަށް ޖިންސީ ގޯނާ ކުރި ތުޙުމަތުގައި އިއްޔެ ފުލުހުންގެ ބެލުމުގެ ދަށަށް ގެނައި 46 އަހަރުގެ މީހާ ކޯޓަށް ގެންދިޔައިރު އޭނާ ޙައްޔަރުކުރިތާ 24 ގަޑިއިރުވެފައިވާތީ އޭނާ ބަންދުން ދޫކޮށްލެވިފައިވާކަމަށެވެ.
