މަގުމަތީގައި ދުންފަތުގެ އިސްތިއުލާކުރުން މަނާކުރުމުގެ ޤާނޫނީ ބާރުވެރިކަން ލިބިފައި ނެތްކަމަށް ހެލްތު މިނިސްޓަރ ޢަބްދުﷲ އަމީން މިއަދު ވިދާޅުވެއްޖެއެވެ.
މިނިސްޓަރ އަމީން މިހެން ވިދާޅުވީ، މިނިސްޓަރާ ސުވާލުކުރުމަށް މިއަދު މަޖިލީހަށް ހާޟިރުކުރުމުން މަޖިލީހުގެ މެންބަރަކު ކުރެއްވި ސުވާލަކަށް ޖަވާބުދެއްވަމުންނެވެ.
މިދިޔަ އަހަރުއްސުރެ މަގުމަތީގައި ދުންފަތުގެ އިސްތިއުމާލު ކުުރުން މަނާކުރުމަށް ނިންމާފައި އޮތް ނަމަވެސް އެކަން ނުކުރެވި ދިގުލައިގެން ދަނީ ކީއްވެގެންތޯ ސުވާލުކުރެއްވީ މައްޗަންގޯޅި ދެކުނު ދާއިރާގެ މެންބަރު މުހައްމަދު ހައިތަމްއެވެ.
ހައިތަމްގެ ސުވާލާއި ގުޅިގެން ހެލްތު މިނިސްޓަރ އަމީން މަޖިލީހުގައި ވިދާޅުވީ، އެކަން ކުރެވޭނީ ޤާނޫނީ ހައްލު ލިބިގެން ކަމަށާއި، އެކަން ވަގުތުން ވަގުތަށް ކުރެވެން ނެތް ކަމަށެވެ.
"އަޅުގަނޑަށް ގަބޫލުކުރެވޭ ގޮތުގައި ގާނޫނީ ބާރުވެރިކަން ލިބުމާއި ހަމަޔަށް ދެވުމުން އެކަން ހައްލުކުރެވޭނީ. އަޅުގަނޑުމެން ދުންފަތް ކޮންޓްރޯލް ކުރުން ނުވަތަ ދުންފަތާ މީހުން ދުރުކުރުމަކީ މިހާރުވެސް ވަރަށް ބޮޑު އަމާޒަކަށް ހަދާފައި ވާނީ. ތި ސުވާލުގެ ސީދާ ޖަވާބަކަށް ދަންނަވަން ޖެހޭނީ ގާނޫނީ ބާރުވެރިކަމާއި ގާނޫނީ ގޮތުން އަންނަން ޖެހޭ ބަދަލުތައް އައުމާއި އެކު އަޅުގަނޑުމެން ތަންފީޒު ކުރާނަން ތިކަން" މިނިސްޓަރ އަމީން ވިދާޅުވިއެވެ.
މިމޭރުމުން ހެލްތު މިނިސްޓަރ ވާހަކަފުޅު ދެއްކެވިއިރު، މާލޭގެ މަގުތަކުގައި ސިނގިރެޓްބުއިން މަނާކުރަން މާލޭ ސިޓީ ކައުންސިލުން، 2019 ވަނަ އަހަރުގެ މެއި މަހުގެ 15 ވަނަ ދުވަހު ވަނީ ނިންމަވާފައެވެ. އޭރު ސިޓީ ކައުންސިލުން ބުނެފައިވަނީ އެ އުސޫލަށް އަމަލުކުރަން ފަށާނީ ހަ މަސް ފަހުން ކަމަށެވެ.
