ސިއްހީ ކުއްލި ނުރައްކަލުގެ ހާލަތު އިއުލާނު ކުރުމާ ގުޅިގެން ހެލްތު ޕްރޮޓެކްޝަން އެޖެންސީން ނެރެ އާންމު ކުރަމުންދާ ގައިޑްލައިން ތަކާ އެއްގޮތަށް އަމަލު ކުރަމުންދޭތޯ ކަށަވަރުކުރުމާއި އެޗް.ޕީ.އޭގެ އިއުލާންތައް ތަންފީޒު ކުރުމަށް މޯލްޑިވްސް ޕޮލިސް ސަރވިސްއިން ގިނަގުނަ މަސައްކަތްތަކެއް ކޮށްފައިވާނެ ކަމަށް މާފަންނު ޕޮލިސް ސްޓޭޝަންގެ ހެޑް ޗީފް އިންސްޕެކްޓަރ އޮފް ޕޮލިސް ރަހުމާ ސައީދު ވިދާޅުވެއްޖެއެވެ.
ޗީފް އިންސްޕެކްޓަރ އޮފް ޕޮލިސް ރަހުމާ ވިދާޅުވެފައިވަނީ އަދިވެސް އެ މަސައްކަތްތައް ކުރަމުންގެންދާނެ ކަމަށާއި އެގޮތުން އިންސްޕެކްޝަން ކުރިއަށްދާ ވަގުތު އިންސްޕެކްޝަންގައި ހިމެނޭ ޓީމުތަކާ އެކުވެސް ފުލުހުން ހަރަކާތްތެރިވަމުންދާނެ ކަމަށާއި ޓީމުތަކުގައި ހިމެނޭ މެމްބަރުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރަން ޖެހޭ އެންމެހައި ކަންކަންވެސް ފުލުހުން ކުރަމުންދާނެ ކަމުގައެވެ.
ރަހުމާ ސައީދު މިހެން ވިދާޅުވީ ކޯވިޑް 19 އާ ގުޅިގެން މާސް އިންސްޕެކްޝަނެއް ފެށުމާ ގުޅޭގޮތުން ހެލްތް އިމަރޖެންސީ އޮޕަރޭޝަން ސެންޓަރުގައި ރޭ ބޭއްވި ޕްރެސް ކޮންފަރެންސްގައި މޯލްޑިވްސް ޕޮލިސް ސަރވިސްގެ ފަރާތުން ވާހަކަފުޅު ދައްކަވަމުންނެވެ.
މީގެ އިތުރުން، އެޗް.ޕީ.އޭ ގެ ގައިޑްލައިންތަކާ ހިލާފުވާ ފަރާތްތަކަށް އެއްވެސް ފިޔަވަޅެއް އަޅަން ޖެހިއްޖެ ހާލަތެއް އަތުވެއްޖެނަމަ އެކަންވެސް ފުލުހުން ކުރަމުންދާނެކަން ރަޙުމާ ވަނީ ފާހަގަކުރައްވާފައެވެ. އަދި މި އިންސްޕެކްޝަން ކުރިއަށްދާ ވަގުތު ތަކުގައި ކެއިން ބުއިމުގެ ހިދުމަތް ދޭ ތަންތަނުގައި، ދުންފަތް ކޮންޓްރޯލް ކުރުމުގެ ގާނޫނުގެ ދަށުން ހެދިފައިވާ ގަވައިދުތަކާ ހިލާފަށް ދުންފަތުގެ އިސްތިއުމާލުކުރާ ތަންތަނާމެދު މިހާރުވެސް އަމަލު ކުރަމުންދާ އުސޫލުގެ މަތިން އެ ތަންތަނަށް އަޅަންޖެހޭ ފިޔަވަޅު އަޅަމުންދާނެ ކަމުގައި ރަހުމާ ވަނީ ވިދާޅުވެފައެވެ.
ރަހުމާ އިތުރަށް ވިދާޅުވެފައިވަނީ މި އިންސްޕެކްޝަނަށް ފަހުވެސް ފުލުހުން މިހާރުވެސް މަސައްކަތް ކުރަމުން ގެންދާގޮތަށް މޮނިޓަރިންގެ މަސައްކަތް ކުރަމުންދާނެ ކަމަށާއި ރައްޔިތުންގެ ސަލާމަތާއި ރައްކާތެރިކަމަށް ކުރަންޖެހުނު ކޮންމެ ކަމެއްވެސް ފަސް ޖެހުމެއްނެތި ފުލުހުން ކުރަމުންދާނެ ކަމަށެވެ.
