އިދިކޮޅު ކޯލިޝަންގެ ލީޑަރު އަދި ކުރީގެ ރައީސް އަބްދުﷲ ޔާމީން ޖަލުގައި އޮންނަވާހާ ހިނދަކު އިންސާފުވެރި އިންތިހާބެއް ނުބޭއްވޭނެ ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
އިންތިހާބުގެ ވަގުތީ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން މިއަދު ކުރިއަށްދާ މަޖިލީހުގެ ޖަލްސާގައި ވާހަކަފުޅު ދައްކަވަމުން މެމްބަރު ޝިޔާމް ވިދާޅުވީ، އިސްލާހުތައް ކުރިން ވެސް އޮތީ ރައީސް އިބްރާހިމް މުހައްމަދު ސޯލިހާއި އެމަނިކުފާނުގެ "ނުފޫޒު އޮތް" އެޗްޕީއޭއިން އިންތިހާބުގެ ކަންކަމުގެ ތެރެއަށް ވަދެވޭ ގޮތަށް ކަމަށެވެ.
ޝިޔާމް ވިދާޅުވީ، ހީވަނީ މިހާރު ރާއްޖޭގައި ވެރިކަން ކުރަނީ އެޗްޕީއޭއިން ހެން ކަމަށެވެ. އިންތިހާބުގެ ކަންކަން ވެސް ފާޑަކަށް ހަވާލު ކުރަނީ އެޗްޕީއޭއަށް ކަން ފާހަގަކުރައްވަމުން ޝިޔާމް ވިދާޅުވީ، މީ ގާނޫނު އަސާސީއާ ހިލާފު ކަންކަން ހިމެނޭ އިސްލާހުތަކެއް ކަމަށެވެ.
ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީގެ ކޮމިޓީތަކުގެ އިންތިހާބު ބޭއްވުމަށް އެ އިންތިހާބުތަކުގެ ވަގުތީ ގާނޫނަށް ހުށަހަޅާފައިވާ އިސްލާހުތަކަކީ އެ އިންތިހާބުގެ ސައްހަ ކަމާ މެދު ސުވާލު އުފެދޭނެ ގޮތަށް އަދި ގެއްލޭނެ ގޮތަށް ގާނޫނު އަސާސީއާ ތައާރަޒުވާ ގޮތަށް ހުރި އިސްލާހުތަކެއް ކަމަށް މަޖިލީހުގެ އިދިކޮޅު ޕީޕީއެމް ޕީއެންސީ މެމްބަރުން ވަނީ ވިދާޅުވެފައެވެ.
