ކޮވިޑް 19 އާ ގުޅިގެން ރަށްރަށަށް ދަތުރުކުރެވޭނެ އުސޫލުތަކެއް ކަނޑައަޅައި ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ގައިޑްލައިން ހަދާފައި އޮތީ ޕީޕީއެމް އަދި ޕީއެންސީގެ އިދިކޮޅު ޕްރޮގްރެސިވް ކޯލިޝަނަށް ކެމްޕޭން ނުކުރެވޭ ގޮތަށް ކަމަށް މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ލީޑަރު އަހުމަދު ޝިޔާމް ވިދާޅުވެއްޖެއެވެ.
މިއަދު މަޖިލީހުގައި ވާހަކަދައްކަވަމުން ޝިޔާމް ވަނީ ސަރުކާރާއި ހެލްތް ޕްރޮޓެކްޝަން އެޖެންސީގެ ނިންމުންތަކަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ޝިޔާމް ވިދާޅުވީ، އެޗްޕީއޭ އިން ގައިޑްލައިން ހަދާފައި އޮތީ އެމްޑީޕީއަށް ކެމްޕެއިން ކުރެވޭ ގޮތަށް ކަމަށެވެ.
ޖުމްހޫރީ ޕާޓީ މީހުންނާއި އެމްޑީޕީ މީހުން އަދާލަތު ޕާޓީ މީހުންވެސް ސަރުކާރު ނަމުގައި ޕްރޮޖެކްޓް އިފްތިތާހު ކުރަން ރަށްރަށަށް ދަތުރުކުރަމުން ދާ ކަމަށް ޝިޔާމް ވިދާޅުވިއެވެ. އެޗްޕީއޭއިން ކަން ކުރަމުންދާ ގޮތް ފާޅުކަން ބޮޑުގޮތެއްގައި އެންގެން އޮތް ކަމަށް ޝިޔާމް ވިދާޅުވިއެވެ.
މީގެ އިތުރުން ކައުންސިލް އިންތިޚާބު ބޭއްވުމަށް ސިއްހީ ގޮތުން ރައްކާތެރި ނޫން ކަމަށް ބުނެ ދައްކާ ވާހަކަތަކުގެ ހަގީގީ މަގްސަދާއި މެދު އޭނާ ވަނީ ސުވާލު އުފައްދާފައެވެ. އެޗްޕީއޭގެ އަތް މައްޗަށް ރާއްޖޭގެ އިންތިހާބުތައް ދީގެން ކަން ކުރުމަކީ ޕީޕީއެމުން ކަންބޮޑުވާ ކަމެއް ކަމަށް ޝިޔާމް ވިދާޅުވިއެވެ.
