ގދ.ގައްދޫ ކައިރީ ފަޅުރަށަކަށް ޕިކްނިކް ގޮސް އުޅުނު 17 އަހަރުގެ ފިރިހެން ކުއްޖެއްގެ ގައިމައްޗަށް ފާރެއް ވެއްޓި ސީރިއަސް އަނިޔާތަކެއް ލިބުނު ކުއްޖާ އިތުރު ފަރުވާއަށް މާލެ ގެނައުމުގެ މަސައްކަތް ފަށައިފިއެވެ.
ގައްދޫ ކައުންސިލްގެ މެންބަރު މުހައްމަދު ލަބީބް އާއި ހަވާލާދީ އޮންލައިން ނޫސް އަވަސްގައި ބުނެފައިވަނީ، ކުއްޖާގެ ފައިގެ ފަލަމަސް ގަނޑާ ދިމާއިންނާއި ކަށިމަތި ބިންދައިގެން ގޮސްފައިވާ ކަމަށާއި އޭނާގެ އެއް ފައިގެ ފުންނާބު ވެސް އޮތީ ވަރަށް ބޮޑަށް ޗިސްވެފައި ކަމަށެވެ.
"ކަށީގެ އޮޕަރޭޝަނެއް ވެސް ކޮށްފަ ބޭރުން ދަގަނޑު ލައްފާފަ މިހާރު އޮތީ. އެކަމަކު ޑޮކްޓަރު ލަފާދީފައި މިހާރު އޮތީ މާލެ ގެންދަން. އެހެންވެ މިހާރު މާލެ ގެންދަން ދަނީ ތައްޔާރުވަމުން،" ލަބީބް ވިދާޅުވެފައިވާކަމަށް އަވަސް ނޫހުގައި ބުނެފައި ވެއެވެ.
މި ހާދިސާ ހިނގާފައިވަނީ މިއަދު ހެނދުނު އިތުރު ބަޔަކާ އެކު ފަޅު ރަށަކަށް ޕިކްނިކް ގޮސްއުޅުމުގެ ތެރޭގައެވެ. އެ ރަށަކީ މީގެ ކުރިން ރިސޯޓެއްގެ ގޮތުގައި ތަރައްގީ ކުރުމުގެ މަސައްކަތްވެސް ކޮށްފައިވާ ރަށެކެވެ.
މަޢުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ، އެ ރަށުގައި އަރި އަޅާލާފައި ހުރި ފާރެއްގެ ބިއްގަނޑެއް ވައްޓާލުމަށްޓަކައި، ތަނބެއް ހަލާކުކޮށްލަން އުޅުމުގެ ތެރޭގައި އެ ފާރު ގައިމައްޗަށް ވެއްޓިގެންނެވެ.
ކުއްޖާގެ އަތާއި ފަޔަށާއި ބޮލަށް ގެއްލުން ލިބިފައިވާއިރު އޭނާއަށް ފަރުވާދެމުންދަނީ، ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލްގެ އައިސީޔޫގައެވެ. އަދި މި ހާދިސާގައި ދެން އަނިޔާވި ފުރާވަރުގެ އިތުރު ފިރިހެން ކުއްޖަކަށް ވެސް އެ ހޮސްޕިޓަލްގައި ދަނީ ފަރުވާ ދެމުންނެވެ. ނަމަވެސް އޭނާގެ ހާލު ސީރިއަސް ނޫންކަމަށް މަޢުލޫމާތު ލިބިފައިވެއެވެ.
