ގދ. ގައްދޫއަށް އަރާ ފޭބުން މަނާ ކޮށްފިއެވެ.
މަޢުލޫމާތު ލިބޭގޮތުގައި އެރަށުން ފުރަތަމަ ޕޮޒިޓިވްވީ ކަރަންޓީނުގައި ހުރި ފަރާތެކެވެ. އަދި އެ ކޭސްއާއި ގުޅިގެން މިހާރު ތިން މީހަކު ޕޮޒިޓިވްވެފައިވާއިރު، އޭގެތެރެއިން ދެމީހުންނަކީ ކަރަންޓީނުގައި ހުރި ދެމަފިރިންކަމަށާއި، އަދި ތިންވަނަ ފަރާތަކީ މިދެމީހުންގެ ޑައިރެކްޓް ކޮންޓެކްޓެއްކަމަށް އެރަށުން މިނޫހަށް މަޢުލޫމާތު ދީފައިވެއެވެ.
އެއީ ދެ ފިރެހެނުންނާއި އަންހެނެކެވެ.
"ގދ. ގައްދޫގައި ކަރަންޓީނުގައި ހުރި ފަރާތެއް ކޮވިޑަށް ޝައްކުކުރެވޭ އަލާމާތްތަކެއް ހުރެގެން ހެދިޓެސްޓް ވަނީ ފައްސިވެފާ." ގައްދޫ ހެލްތު ސެންޓަރުން އިއްޔެ ބުނެފައިވެއެވެ.
ގައްދޫ ކަރަންޓީނަށް ލާފައިވަނީ މިރޭގެ ވަގުތެއްގައެވެ.
ކޮވިޑާއި ގުޅިގެން އަތޮޅުތެރޭގެ 31 ރަށެއް މިހާރުވެސް އޮތީ މޮނިޓަރިންގގައެވެ. އެރަށްތަކަކީ ޅ.ނައިފަރު، އދ.މާމިގިނލި، ތ.ވޭމަންޑޫ، ތ.މަޑިފުށި، ބ.އޭދަފުށި، ކ.ހިންމަފުށި، ކ.ގުޅި، ކ.މާފުށި، އއ.މަތިވެރި، ލ.މާންދޫ، ލ.ގަން، ލ.ފޮނަދޫ، ގދ.ތިނަދޫ، އއ.އުކުޅަސް، ކ.ތުލުސްދޫ، ލ.ދަނބިދޫ، އއ.ރަސްދޫ، އައްޑޫސިޓީ، ހއ. ދިއްދޫ، ފ.ފީއަލި، ހދ. ހަނިމާދޫ، ކ.ގުރައިދޫ، ފ.ނިލަންދޫ، ލ.އިސްދޫ، އދ.ފެންފުށި، ލ.މާވަށް، ޏ.ފުވައްމުލަށް، ނ.ވެލިދޫ، ށ.ފުނަދޫ، ށ.ޅައިމަގު އަދި ރ. ހުޅުދުއްފާރުގެ އިތުރުން ގދ.ގައްދޫއެވެ.
