ކޮވިޑް-19 ޕެންޑަމިކް ތެރޭގައި ރޯދަހިފުމަކުން ސިއްހަތަށް އިތުރު އެއްވެސް ނުރައްކަލެއް ނެތްކަމަށް އިނގިރޭސިވިލާތުގައި ހެދުނު ދިރާސާއަކުން ދައްކައިފިއެވެ.
"ޖާނަލް އޮފް ގްލޯބަލް ހެލްތް"ގައި މިއަދު ޝާއިއުކުރި ދިރާސާއެއްގައި ބުނެފައިވާ ގޮތުގައި ރަމަޟާންމަހު ރޯދަހިފުމުގެ ސަބަބުން ކޮވިޑް-19 ޕެންޑަމިކްތެރޭ މަރުވާމީހުންގެ އަދަދު އިނގިރޭސިވިލާތުގައި އިތުރުވެފައެއް ނުވެއެވެ.
"އަޅުގަނޑުމެންގެ ހޯދުންތަކުން ދައްކާގޮތުގައި ރަަމަޟާންމަހާއި ގުޅިގެން ކުރާކަންތައްތަކުގެ ސަބަބުން ކޮވިޑް-19 ޖެހިގެން މަރުވާ މީހުންގެ އަދަދުތައް އިތުރުވެގެންނުދޭ" ދިރާސާގައި ބުނެފައި ވެއެވެ.
ރަމަޟާންމަހާއި ގުޅިގެން ކޮވިޑް-19ގެ މަރުތައް އިތުރުވެގެންނުދާކަމަށް ބުނެ ސިއްހީ ދިރާސާއެއް ނެރެފައި މިވަނީ މިއަހަރުގެ ރަމަޟާންމަސް އައްނަން މަދު ދުވަސްކޮޅަކަށް ވެފައި ވަނިކޮށެވެ.
މިދިޔަ އަހަރު ރަމަޟާންމަހާއި ގުޅިގެން އިނގިރޭސިވިލާތުގައި ކޮވިޑް-19 މަރުތައް އިތުރުވެފައިވާކަމަށްބުނެ ބަޔެއް ފަރާތްތަކުން ވާހަކަދައްކައިފައި ވެއެވެ. މިއަހަރުގެ ރަމަޟާންމަސް އައްނާނެކަމަށް ފަލަކީ ހިސާބުތަކުން ދައްކަނީ މިމަހުގެ 13 ވަނަ ދުވަހުއެވެ.
