ދިވެހިރާއްޖެއަށް ފަތުރުވެރިން ޒިޔާރަތްކުރާ ބައެއް މާކެޓްތަކަށް ބޮޑެތި ކުރިއެރުން ތަކެއް މިއަހަރު ލިބިފައިވާކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން ބުނީ، ޔޫރަޕް ސަރަޙައްދަށް ބަލާއިރު ސެންޓްރަލް އީސްޓަރން ޔޫރަޕް ސަރަޙައްދުން މިއަހަރުގެ މެއިމަހުގެ 5 ވަނަ ދުވަހުގެ ނިޔަލަށް 185,090 ފަތުރުވެރިން ޒިޔާރަތްކޮށްފައިވާކަމަށާއި، މިއީ 2019 ވަނައަހަރުގެ މިމުއްދަތާއި އަޅާބަލާއިރު 136.8 އިންސައްތައިގެ ކުރިއެރުމެއްކަމަށާއި އަދި އޭޝިއާ ސަރަޙައްދަށް ބަލާއިރު ސައުތު އޭޝިއާ ސަރަޙައްދުން މިމުއްދަތުގައި 95,179 ފަތުރުވެރިން ޒިޔާރަތްކޮށްފައިވާއިރު މިއީ 2019 ވަނައަހަރުގެ މިމުއްދަތާއި އަޅާބަލާއިރު 227.1 އިން ސައްތައިގެ ކުރިއެރުމެއްކަމަށެވެ.
އެގޮތުން ވަކި މާރކެޓްތަކަށްބަލާއިރު، 2021 ވަނައަހަރު ބޮޑެތި ކުރިއެރުންތައް ހޯދަމުން އަންނަ އާ މާރކެޓްތަކުގެ ތެރޭގައި ހިމެނެނީ ކަޒަކިސްތާން، ޔޫކްރެއިން، ރޮމޭނިއާ، ބަލްގޭރިއާ، ޕޮލޭންޑް އަދި ސްލޮވޭކިޔާ ފަދަ ޤައުމުތަކެވެ. މިމާކެޓްތަކުން ވަނީ 2019 ވަނައަހަރުގެ މެއިމަހުގެ 5 ވަނަދުވަހުގެ ނިޔަލަށް ޒިޔާރަތްކުރި ފަތުރުވެރިންނާއި އަޅާބަލާއިރު 2021 ވަނަ އަހަރުގެ މިމުއްދަތުގައި ޒިޔާރަތްކުރި ފަތުރުވެރިންގެ ޢަދަދު ވަރަށްބޮޑަށް އިތުރުވެފައެވެ.
މީގެއިތުރުން ރާއްޖެއަށް ފަތުރުވެރިން އެންމެގިނައިން ޒިޔާރަތްކުރާ 10 މާރކެޓްގެ ތެރޭގައި ހިމެނޭ ރަޝިއާ އާއި އިންޑިއާ ފަދަ ޤައުމުތަކުން ވެސް ވަނީ 2021 ވަނައަހަރުގެ މެއިމަހުގެ 5 ވަނަދުވަހުގެ ނިޔަލަށް ޒިޔާރަތްކުރި ފަތުރުވެރިންގެ ޢަދަދު 2019 ވަނައަހަރުގެ މިމުއްދަތާއި އަޅާބަލާއިރު ބޮޑުތަނުން އިތުރުވެފައިވާކަމަށްވެސް ޓޫރިޒަމް މިނިސްޓްރީންވަނީ ބުނެފައެވެ.
ޓޫރިޒަމް މިނިސްޓްރީން ބުނީ، 2020 ވަނަ އަހަރަކީ ރާއްޖޭގެ ބޯރޑަރުތައް ބަންދުކުރެވިފައިވާ ޙާއްސަ އަހަރެއްކަމުން އެނަލިސިސް ހެދުމުގައި 2020 އަހަރާއި އަޅާ ކިއުމުގެ ބަދަލުގައި ފަތުރުވެރިން ޒިޔާރަތްކުރި ނިސްބަތް އަޅާކިޔާފައިވަނީ 2019 އަހަރުގެ މިމުއްދަތުގައި ޒިޔާރަތްކުރި ފަތުރުވެރިންގެ ޢަދަދާކަމަށެވެ.
