ފ. ފީއަލުން އިތުރު 14 މީހަކު ކޮވިޑް-19 އަށް ޕޮޒިޓިވްވެއްޖެއެވެ.
ފީއަލީ ހެލްތް ސެންޓަރުން ހާމަކުރައްވާފައިވާ ގޮތުގައި އެރަށުން ފާއިތުވި 24 ގަޑި އިރުގެ ތެރޭގައި 14 މީހަކު ވަނީ ކޮވިޑަށް ޕޮޒިޓިވް ވެފައެވެ. އެއީ އެރަށުން ނެގި 30 ސާމްޕަލްގެ ތެރެއިންނެވެ.
މީގެ އިތުރުން ނަތީޖާ ނުލިބި 39 ސާމްޕަލެއް ހުރިއިރު، އިއްޔެ ވެސް ވަނީ 20 މީހެއްގެ ސާމްޕަލް އެރަށުން ނަގާފައެވެ. މިހާތަނަށް އެރަށުން ވަނީ ޖުމްލަ 831 ސާމްޕަލެއް ނަގާފައެވެ. އޭގެ ތެރެއިން 733 ސާމްޕަލެއް ވަނީ ނެގެޓިވް ވެފައެވެ.
ފީއަލިން މިހާތަނަށް 59 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރެއިން 9 މީހަކު މިހާރުވަނީ މި ބަލިން ރަނގަޅުވެފައެވެ.
ފީއަލިން މި ނޫހަށް މަޢުލޫމާތު ދިން މީހަކު ބުނި ގޮތުގައި އެރަށުން ކޮވިޑްޖެހުނު މީހުންގެ ތެރޭގައި އެރަށު ސްކޫލްގެ ޓީޗަރުންނާއި ގިނަ އަދަދެއްގެ ދަރިވަރުންވެސް ހިމެނެއެވެ.
ފީއަލިން ނެގި ފުލޫ ސާމްޕަލްތަކެއް ކޮވިޑަށް ޕޮޒިޓިވް ވުމާއި ގުޅިގެން މެއި 2 ވަނަ ދުވަހުން ފެށިގެން އެރަށް ވަނީ މޮނިޓަރިންއަށް ލާފައެވެ. މިހާރުވެސް އެރަށުގައި ގިނަ އަދަދެއްގެ ބަޔަކު ތިބީ ކަރަންޓީންގައެވެ.
ރާއްޖޭގައި ކޮވިޑް-19 ހަލުވި ކަމާއެކު ފެތުރެމުން އަންނައިރު، އަތޮޅު ތެރޭގެ ގިނަ ރައްތަކެއްގައިވެސް ވަނީ މި ބަލި ވަރަށް ބޮޑަށް ފެތުރިފައެވެ. އެގޮތުން މިހާރުވެސް އަތޮޅު ތެރޭގެ 33 ރަށެއް ވަނި މޮނިޓަރިންގެ ހާލަތަށް ގެނެސްފައެވެ.
