ހަރުކަށި ފިކުރާ ދެކޮޅަށް އައްޑޫ ސިޓީގައި ފުލުހުން ހިންގި އޮޕަރޭޝަން ތަކުގައި ހައްޔަރު ކުރި ބައެއް މީހުން ކޯޓުން ދޫކޮށްލައިފިއެވެ.
ފުލުހުން ވިދާޅުވީ ހަރުކަށި ފިކުރާއި ދެކޮޅަށް އައްޑޫ ސިޓީގައި ފުލުހުން ހިންގި އޮޕްރޭޝަންތަކުގައި ހައްޔަރުކޮށް ފުލުހުންގެ ބަންދުގައި ތިބި 8 މީހުންގެ ތެރެއިން 5 މީހެއްގެ ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން އެމީހުން ވަނީ ދޫކޮށްލާފައި ކަމަށެވެ.
ނަމަވެސް ފުލުހުން ވިދާޅުވީ މި މައްސަލަތަކުގެ ތަޙްޤީޤު ފުލުހުން ދަނީ ބަލަމުންކަމަށެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދިން ޓެރަރިސްޓް ހަމަލާއަށްފަހު، ހަރުކަށި ފިކުރާދެކޮޅަށް ފުލުހުންނާއި ސިފައިން ގުޅިގެން ބޮޑު އޮޕަރޭޝަނެއް ވަނީ ފަށާފައެވެ. އަދި މި އޮޕަރޭޝަންގައި ގިނަ ބަޔަކު ވަނީ ހައްޔަރުވެސް ކޮށްފައެވެ.
މީގެ އިތުރުން ސިފައިން ވަނީ ހަތިޔާރާއެކު މާލެއާއި ރާއްޖޭގެ އެކި ސަރަހައްދުތަކުގައި ހަރަކާތްތެރިވެފައެވެ.
ރައީސް ނަޝީދަށް ދިން ޓެރަރިސްޓް ހަމަލާއާއި ގުޅިގެން މިހާތަނަށް ހައްޔަރުކޮށްފައިވަނީ ހަތަރު މީހެކެވެ. އެއީ ބޮންގޮއްވާލިކަމަށް ތުހުމަތުކުރެވޭ މީހާ ކަމަށްވާ އަދުހަމް އަހުމަދާއި މއ. ފޭރުގެ މުޖާޒް އަހްމަދު 21، އަދި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ. މީގެ އިތުރުން ލ. ގަން، ދުންފިނިއުފާ، އަޙްމަދު ފާތިޙްއެވެ.
ފުލުހުންގެ އޮޕަރޭޝަންތަކުގައި ހައްޔަރު ކުރި 5 މީހަކު ކޯޓުން ދޫކޮށްލާފައި ވާއިރު، ޓެރަރިޒަމްގެ ކުށްތަކުގައި ކޯޓު އަމުރަކާ ނުލައި ތަންތަން ބަލައި ފާސްކުރެވޭގޮތަށް ޓެރަރިޒަމް މަނާކުރުމުގެ ޤާނޫނަށް ސަރުކާރުން މިހާރު ވަނީ އިސްލާހު ހުށައަޅާފައެވެ.
މި އިސްލާހު ސަރުކާރުގެ ފަރާތުން އެޓާނީ ޖެނެރަލް މަޖިލީހަށް ހުށަހަޅުއްވަފައިވަނީ މިއަދުއެވެ.
