ހަމަނުޖެހުންތަކުގެ އަޞްލަކީ، ހަރުކަށި ފިކުރީ އޮއިވަރަށް ޖާގަ ދެވިފައި އޮތުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު ރާއްޖޭގެ 56 ވަނަ މިނިވަން ދުވަހު މުނާސަބަތުގައި ގައުމާ މުހާތަބުކޮށް ދެއްވި ހިތާބުގައި ވިދާޅުވީ، މިނިވަންކަމާއި ޞުލްޙަޔާއި އެކުވެރިކަމުގެ އަސާސްތައް ކަނޑައަޅައިދިން އިސްލާމްދީނަކީ، ޙައްޤަކާ ނުލައި މީހުންގެ ލޭ ހުއްދަކުރާ ދީނެއް ކަމުގައި ދެކި، އެ ވިސްނުން ފަތުރައި ޢާންމުކުރުމަށް، ހަމަ އަޅުގަނޑުމެންގެ ތެރެއިން ބަޔަކު ވަރަށް ފާޅުގައި އެބަ މަސައްކަތްކުރާ ކަމަށެވެ. އަދު މިއީ ރާއްޖޭގެ މިނިވަންކަމާއި ސިޔާދަތު ރައްކާތެރިކުރުމަށް އެދޭ ހަމަ ކޮންމެ މީހަކުމެ، ފާޅުގައި އެކަމާ ދެކޮޅަށް ތެދުވަންޖެހޭ، ވަރަށް ނުރައްކާތެރި ކަމެއް ކަމަށް ރައީސް ވިދާޅުވިއެވެ.
ރައީސް ސޯލިހް ވިދާޅުވީ، މިއަދުގެ ބައިނަލްއަޤުވާމީ މުޖުތަމަޢުން، ވަކިން ޚާއްޞަކޮށް، ބައެއް އިސްލާމީ ޤައުމުތަކުން ފެންނަ ހަނގުރާމަތަކާއި ހަމަނުޖެހުންތަކުގެ އަޞްލަކީ، މި ދެންނެވި ހަރުކަށި ފިކުރީ އޮއިވަރަށް އެ ޤައުމުތަކުގައި ޖާގަ ދެވިފައި އޮތުން ކަމަށެވެ.
"އެއިން ކޮންމެ ޤައުމެއްގައިވެސް އެންމެ ފުރަތަމަ އުފެދުނީ، އެއް ބަޔަކު އަނެއް ބައެއްގެ ފުރާނައާއި މުދަލަށް ގެއްލުން ދިނުމުގެ ޢަމަލުތައް. އޭގެފަހުން ފެންނަން ފެށީ، އެކިއެކި ފަރާތްތަކުގެ ނުފޫޒު ފެތުރެން ފެށި މަންޒަރު. މިއަދު އެއިން ކޮންމެ ޤައުމަކީ، މިނިވަންކަމާއި ޞުލްޙަޔާއި ހަމަޖެހުން ގެއްލިފައި އޮތް ޤައުމެއް." ރައީސްގެ ވާހަކަފުޅުހުގައި ވިދާޅުވިއެވެ.
ރައީސް ވިދާޅުވިގޮތުގައި ރާއްޖޭގައި މަޒްހަބީ ތަފާތުތަކެއް ނެތުމަކީ އެއްބައިވަންތަކަން އިތުރަށް ވަރުގަދަކޮށްދޭ ކަމެކެވެ. އެހެންނަމަވެސް އިސްލާމް ދީނުގެ ނަމުގައި މުޖުތަމައުގައި ފަތުރަމުން އަންނަ ހަރުކަށި ފިކުރުތަކާއި ހައްދުފަހަނައެޅުމުގެ ޢަމަލުތަކަކީ އެއްވެސް ގޮތަކުން އިސްލާމް ދީނާ ގުޅުމެއް ނެތް ބާތިލު ކަންތައްތަކެއްކަމަށް ރައީސް ސޯލިހު ވިދާޅުވިއެވެ.
"އެއީ އެއްވެސް ހަމައަކުން ބަލާއިރު، އިސްލާމް ދީނުގެ އަހުލާގީ ހަމަތަކާއި، ދީނީ އުސޫލުތަކާ ގުޅުމެއް ހުރި ފިކުރުތަކެއް ނޫން. އިންސާނީ ހަމަބުއްދިން ވިސްނާއިރު ވެސް، އިންސާނީ މުޖްތަމަޢެއްގައި ފަތުރަން ހެޔޮވާ ވަރުގެ ފިކުރުތަކެއް ނޫން،" ރައީސް ސޯލިހު ވިދާޅުވިއެވެ.
ރައީސް ވިދާޅުވިގޮތުގައި، އިސްލާމްދީނަށް އިހާނެތިކުރުމާއި ފުރައްސާރަކުރުމުގެ ޢަމަލުތަކަކީވެސް، މުޖުތަމަޢު ބައިބައިކޮށް ފަސާދައަށް މަގު ފަހިކުރާ، ވަރަށް ނުރައްކާތެރި ޢަމަލުތަކެކެވެ.
"އެހެންކަމުން، މީހުންގެ މެދުގައި އަނެކުންނާ ދޭތެރޭ ނަފްރަތު އުފެއްދުމަށް ހިންގާ ޢަމަލުތަކާއި، އިސްލާމް ދީނަށް އިހާނެތިކުރުމުގެ ޢަމަލުތައް ހުއްޓުވުމަކީ، ޤައުމުގެ މިނިވަންކަމާއި ހަމަޖެހުން ދެމެހެއްޓުމަށްޓަކައި، ކޮންމެ ފަރުދަކުވެސް އިސްކަން ދޭންޖެހޭނެ ކަމެއް،" މިއީ ރާއްޖޭގައި އޮވެގެން ނުވާނެވަރުގެ އިޖްތިމާޢީ ބޮޑު ދެ މައްސަލަ ކަމަށް ރައީސް ސޯލިހު ވިދާޅުވިއެވެ.
ރައީސް ވިދާޅުވީ، މި ދެ މައްސަލައިގެ ހަމައެކަނި ޙައްލަކީ ޤާނޫނީ ފިޔަވަޅުތަކެއް އެޅުމެއް ނޫނެވެ. މި ދެ މައްސަލައަށް އޮތް ދާއިމީ ޙައްލަކީ، އިސްލާމްދީނުގެ ޞައްޙަ ޢަޤީދާގެ މަތީގައި ދަރިން ތަރުބިއްޔަތުކޮށް ބޮޑެތިކުރުންކަމަށް ރައީސްގެ ހިތާބުގައި ވިދާޅުވިއެވެ.
"ތުއްތުކުދިންގެ ޅަފަތުން ފެށިގެން، އިސްލާމްދީނުގެ ޞައްޙަ ޢަޤީދާގެ މަތީގައި، އެ ކުދިންގެ ދިރިއުޅުން ބިނާކޮށްނުދެވިއްޖެނަމަ، ކޮންމެވެސް ދުވަހަކުން އަނެއްކާވެސް، މި ދެ މައްސަލަ ކުރިމަތިވާން ފަށާނެ. އެހެންކަމުން، ތަޢުލީމީ ނިޒާމުގެ ތެރެއިން، މިކަން ޙައްލުކުރެވެން ހުރި ގޮތްތަކަކީ ކޮބައިކަން ދެނެގަނެ، އެކަމަށް ސަރުކާރުން މި އަންނަނީ މަސައްކަތް ކުރަމުން." މިކަމަށްޓަކައި ސަރުކާރުން މިހާރުވެސް މަސައްކަތްކުރަމުން އަންނަކަން ފާހަގަކޮށް ރައީސް ވިދާޅުވިއެވެ.
ރައީސްގެ ހިތާބުގައި ވަނީ މިނިވަންދުވަހުގެ ތަހުނިޔާއާ ރައްޔިތުންނަށް އަރިސްކުރައްވަމުން، މިނިވަންކަމާއި ސިޔާދަތު ރައްކާތެރިކުރެއްވުމުގައި ޤުރްބާންވެވަޑައިގެންނެވި މަތިވެރި ބަތަލުންގެ ގައުމީ ޖިހާދުގެ ހަނދާން އާ ކުރުމަކީ ކޮންމެ ދިވެއްސެއްގެވެސް ކޮނޑުގައި އެޅިފައިވާ ޒިންމާއެއްކަމަށް ސިފަކުރައްވާފައެވެ.
