މިމަހުގެ 20 ވަނަ ދުވަހު މާފުށި ޖަލުގައި ހިނގި ހާދިސާ ތަހުޤީޤުކޮށް ނިމެންދެން، އިމަޖެންސީ ސަޕޯރޓް ގްރޫޕްގެ ކޮމާންޑަރ ހުންނާނީ ސަސްޕެންޝަނުގައި ކަމަށް ހޯމް މިނިސްޓްރީން ވިދާޅުވެއްޖެއެވެ.

ހޯމް މިނިސްޓަރ ޝައިޚް އިމްރާން ޢަބްދުﷲ ވަނީ، އޭނާ ސަސްޕެންޑް ކުރުމަށް ކޮމިޝަނަރ އޮފް ޕްރިޒަންސްއަށް މިއަދު އަންގަވައިފައެވެ.

މިނިސްޓަރ އެގޮތަށް އެންގެވީ އެމައްސަލައާއި ގުޅިގެން މަޢުލޫމާތު ސާފްކުރައްވާ ހާލަތު ދެނެގަތުމަށް މިއަދު ހެނދުނު މާފުށި ޖަލަށް ޒިޔާރަތްކުރައްވާ، މައުލޫމާތު އޮޅުންފިލުއްވުމަށްފަހުއެވެ. މިއަދު މާފުށްޓަށް ވަޑައިގެން މިނިސްޓަރ ވަނީ ކަރެކްޝަންސްގެ އިސް އޮފިސަރުންނާ ބައްދަލުކުރައްވާފައެވެ. 

މި ހާދިސާގައި އަނިޔާލިބުނު ފަރާތްތަކާވެސް މިނިސްޓަރ ބައްދަލުކޮށް މައުލޫމާތު އޮޅުންފިލުއްވާފައިވާއިރު، މިނިސްޓަރ ޢިމްރާން ޢަބްދުﷲ ވިދާޅުވީ މިމައްސަލަ ބަލާނިމިގެން އިރާދަކުރެއްވިއްޔާ އަޅަންޖެހޭ ފިޔަވަޅުތައް އެޅިގެންދާނެކަމަށެވެ.

"ރާއްޖޭގެ ޖަލުތަކަކީ އެތައް އަހަރެއް ވަންދެން ހައްލެއް ނައިސް އޮތްތަނެއް. އެހެންވީމާ އެކަން ހައްލުކޮށް ޖަލަށް ހެޔޮބަދަލުތަކެއް ގެނައުމަށް ކުރަންޖެހޭ ވަރަށްގިނަ ކަންކަން އެބަހުރި. އެހެންވީމާ އެކަންކުރުމުގައި އިރާދަކުރެއްވިއްޔާ އަޅުގަނޑުމެން އެބަދެމިތިބީމު. އަޅުގަނޑު ޔަޤީންކަން ދެން އިރާދަކުރެއްވިއްޔާ މިހާލަތުން އަރައިގަތުމާހަމައަށް ގެންދަން އަޅުގަނޑުމެން މަސައްކަތްކުރާނަން. މިއަދުން ފެށިގެން އިރާދަކުރެއްވިއްޔާ އެފަދަކަމެއް ތަކުރާރުވިޔަ ނުދިނުމަށް، ހާދިސާއެއް ހިނގުމުން އެކަށީގެންނުވާ މިންވަރަށް ބާރުގެ ބޭނުން ނުކުރެވޭނެގޮތަކަށް އިންތިޒާމް ކުރުމުގެ ކަންކަން އަޅުގަނޑުމެން އިރާދަކުރެއްވިއްޔާ ކުރިއަށްގެންދާނަން." މިނިސްޓަރ ވިދާޅުވިއެވެ.

މައްސަލަ ތަހުޤީޤުކޮށް ނިމި، އަޅަންޖެހޭ ފިޔަވަޅުތައް އެޅުމުގައި ފަސްނުޖެހޭނެކަމުގެ ޔަޤީންކަން މިނިސްޓަރ ވަނީ ދެއްވާފައިވާއިރު، މައްސަލަ ތަހުޤީޤުކުރެއްވުމަށް އިންސްޕެކްޓަރ އޮފް ކަރެކްޝަންސްއަށް އެންގެވުމާ ގުޅިގެން އެމަސައްކަތް އިންސްޕެކްޓަރ އޮފް ކަރެކްޝަން ގެންދަވަނީ ކުރައްވަމުންނެވެ.

ހާދިސާ ހިނގުމާއެކު އެރޭ އިންސްޕެކްޓަރ އޮފް ކަރެކްޝަން އިން ޖަލަށް ވަޑައިގެން ތަހުޤީޤު ފައްޓަވާފައިވާއިރު، މިއަދުވެސް ޖަލަށް ވަޑައިގެން އިންސްޕެކްޓަރ އޮފް ކަރެކްޝަންސް ވަނީ ހާދިސާގެ މައުލޫމާތު ހޯދާ، ތަހުޤީޤުގެ މަސައްކަތް ކުރިއަށްގެންދަވާފައެވެ.