މިދިޔަ ބުރާސްފަތި ދުވަހު މާފުށީ ޖަލު ހިނގާދިޔަ ހަމަނުޖެހުންތަކާ ގުޅިގެން ކުރިއަށްދާ ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ ބައްދަލުވުން ސިއްރު ކޮށްފިއެވެ.
ރައްޔިތުންގެ މަޖިލީހުގައި މިހާރު ކުރިއަށްދާ، ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ ބައްދަލުވުމަށް ހާޒިރުވުމަށް ކޮމިޝަނަރ އޮފް ޕްރިޒަން އަބްދުﷲ މުނާޒް އާއި ހޯމް މިނިސްޓަރ ޝައިޚް އިމްރާން ޢަބްދުﷲ އަށް އެންގެވި ނަމަވެސް ކޮމެޓީއަށް ހާޒިރުވެފައިވަނީ ކޮމިޝަނަރު އޮފް ޕްރިޒަންސްއެވެ.
އެ ކޮމިޓީގެ ބައްދަލުވުން ސިއްރުކޮށްފައިވަނީ ކޮމެޓީގެ މެންބަރުން ކުރެއްވި ވަރަށް ގިނަ ސުވާލަށް ލައިވް ޓީވީން ބްރޮޑްކާސްޓް ކުރަމުން ދަނިކޮށް ޖަވާބު ދެއްވުމަށްފަހުގައެވެ. ބައްދަލުވުމުގެ ވަކި ހިސާބަކުން ސިއްރު ކުރަން ނިންމެވީ، ބައެއް ސުވާލުތަކަށް ލައިވް ޓީވީގައި ޖަވާބު ދެއްވެން ނެތްކަމަށް ކޮމިޝަނަރު ތަކުރާރުކޮށް ދެންނެވުމާއި ގުޅިގެންނެވެ.
ކޮމިޓީގެ ބައްދަލުވުން ސިއްރުކުރަން ނިންމާފައިވަނީ، އެކަމާ މެދުގައި ގޮތެއް ނިންމުމަށް ކޮމެޓީއަށް ހާޒިރުވެ ތިއްބެވި މެންބަރުންގެ މެދުގައި ވޯޓެއް ނަގައި، ކޮމެޓީގެ ބައްދަލުވުމުގެ ބާކީ ބައި ސިއްރު ކުރުމަށް ނިންމުމުންނެވެ.
ކޮމެޓީ ބައްދަލުވުމުގައި މެންބަރުން ވަނީ ޖަލުގައި ހިނގި ހަމަނުޖެހުންތަކާ ގުޅުންހުރި ވަރަށް ގިނަ ކަންކަމާއި މެދުގައި ސުވާލުކުރައްވާފައެވެ. އޭގެ ތެރެއިން ލައިވް ޓީވީގައި ޖަވާބު ދެއްވޭނެ ހުރިހާ ސުވާލަކަށް ކޮމިޝަނަރ ވަނީ ވަރަށް ފުރިހަމައަށް ޖަވާބު ދެއްވާފައެވެ. އަދި އެކަމަށްޓަކައި ކޮމެޓީގެ މުޤައްރިރުވެސް ވަނީ ޝުކުރު ދަންނަވާފައެވެ.
ކޮމެޓީގެ ބައްދަލުވުމުގައި ބާކީ ހުރި ސުވާލުތަކަށް ދެއްވަން ޖެހިވަޑައިގަންނަވާ ސުވާލުތަކުގެ ޖަވާބުތަކަކީ ލައިވް ޓީވީގައި ދެއްވުމުން ޤައުމީ ސަލާމަތަށް ނުރައްކާވެދާނެ ވާހަކަތަކެއް ކަމުން މިފަދަ ގޮތަކަށް ކޮމެޓީ ސިއްރު ކުރުމަކީ ކުރެވިދާނެ ކަމެެކެވެ.
