2019 ޖޫން 20 ވީ ބުރާސްފަތި ދުވަހު ކ.މާފުށީގައި ހުންނަ ޖަލުގައި ހިނގި ހަމަނުޖެހުންތަކުގައި ޤައިދީންނަށް އަނިޔާކުރި ޖަލު އޮފިސަރުން ހޯދިފައި ނުވާކަމަށް ކޮމިޝަނަރ އޮފް ޕްރިޒަންސް ޢަބްދުﷲ މުނާޒް ވިދާޅުވެއްޖެއެވެ.
މުނާޒް މިހެން ވިދާޅުވީ، މިހާރު ކުރިއަށްދާ ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ ބައްދަލުވުމުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.
މުނާޒް ވިދާޅުވީ، އެ ހަމަނުޖެހުމުގައި އެކަށީގެންވާ ބާރުގެ މިންވަރަށްވުރެ އިތުރަށް ބާރު ބޭނުންކޮށް ޤައިދީންނަށް އަނިޔާކޮށްފައިވަނީ ކޮން އޮފިސަރުންތަކެއް ކަން މިއަދު އިރުއޮއްސުމާ ހަމައަށްވެސް ހޯދިފައި ނުވާ ކަމަށާއި، ކަރެކްޝަންސް ސަރވިސްގެ އިމަޖެންސީ ސަޕޯޓް ގްރޫޕް (އީއެސްޖީ) ގެ ކޮމާންޑަރ ސަސްޕެންޑް ކުރަން ޖެހުނީވެސް އެ އޮފިސަރުން ހޯފިފައި ނުވާތީ ކަމަށެވެ.
ޖަލު ހަމަނުޖެހުމުގެ ރިޕޯޓް ލިބުނުއިރު އެ ކަމުގައި ސާފުވާންޖެހޭ ބައެއް މަޢުލޫމާތު ފުރިހަމަވެފައި ނެތުމުން އެ މަޢުލޫމާތު ފުރިހަމަކޮށްފައި އަލުން ރިޕޯޓް ހުށަހަޅަން އީއެސްޖީއަށް ފުރުޞަތު ދެއްވި ނަމަށާއި، ނަމަވެސް ދެވަނަ ފަހަރަށް ރިޕޯޓް ގެނައި އިރުވެސް އެ މަޢުލޫމާތުތައް ހިމަނާފައި ނުވާކަމަށް މުނާޒް ވިދާޅުވިއެވެ.
ކަރެކްޝަންސް އޮފިސަރުންނަކީ ޤައިދީން ގޮތަށް ރިހިބިލިޓޭޓް ކުރަންޖެހޭ ބަޔަކަށް ވުމަކީ ކަންބޮޑުވާ މައްސަލައެއް ކަމަށާއި، އެ ހަމަނުޖެހުމުގައި ބައިވެރިވި އޮފިސަރުން ހޯދުނުހާ އަވަހަކަށް މަސައްކަތުން އެއްފަރާތް ކުރައްވާނެކަމުގެ އިޝާރާތެއްވެސް މުނާޒް ދެއްވިއެވެ.
ޖަލުގައި ހިނގި ހަމަނުޖެހުންތަކުގައި 16 އިންޗީގެ އެނބުރި ދަނގަނޑުބުރިއަކުން ޖަހައި ކަރެކްޝަންސް ސަރވިސްގެ އޮފިސަރެއްގެ ކަންފަތްމަތި ފަޅާލާފައިވާއިރު، އެ އޮފިސަރު ވަނީ އަނބުރައިގަނެގެން މާފުށީ ޖަލުގެ ހަތަރު ނަންބަރު ޔުނިޓް ކައިރިއަށް ވެއްޓިފައެވެ. އަދި އެކަމާ ގުޅިގެން އީއެސްޖީ ގްރޫޕް ހިންގި އޮޕަރޭޝަނުގައި ހަތް ޤައިދީއަކަށް އެކިވަރުގެ އަނިޔާވެފައިވެއެވެ.
ހޯމް މިނިސްޓްރީން ވިދާޅުވެފައިވަނީ، އެ މައްސަލައިގެ ތަޙްޤީޤު ނިމެންދެން ކޮމާންޑަރ ހުންނަވާނީ ސަސްޕެންޝަނުގައި ކަމަށެވެ.
