މިއަހަރުގެ ފުރަތަމަ ފަސް މަހު ރާއްޖެއިން މަސް އެކްސްޕޯޓްކޮށްގެން ލިބުނު އާމްދަނީ 40 އިންސައްތަ އިތުރުވެއްޖެއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު ތަފާސް ހިސާބު ރިޕޯޓުގައި ދައްކާގޮތުން، މިއަހަރުގެ ފުރަތަމަ ފަސް މަހު މަސް އެކްސްޕޯޓްކޮށްގެން 63.7 މިލިއަން ޑޮލަރު ވަނީ ލިބިފައެވެ.
މިއީ މިދިޔަ އަހަރުގެ މި މުއްދަތުގައި ލިބުނު 45.5 މިލިއަން ޑޮލަރާ އަޅާބަލާއިރު 40 އިންސައްތައިގެ ކުރިއެރުމެކެވެ. މިގޮތުން އެންމެ މަތީ އާމްދަނީއެއް ލިބިފައިވަނީ އެޕްރީލް މަހު ކަމަށްވާއިރު، އެމަހު އެކަނި 18.2 މިލިއަން ޑޮލަރުގެ އާމްދަނީ ވަނީ ލިބިފައެވެ.
މަސް ބޭރުކުރި މިންވަރަށް ބަލާއިރު، މިއަހަރުގެ ފުރަތަމަ ފަސް މަހު ޖުމްލަ 38,800.6 މެޓްރިކް ޓަނުގެ މަސް ވަނީ ބޭރުކޮށްފައެވެ. މިއީ މިދިޔަ އަހަރުގެ މިމުއްދަތުގައި ބޭރުކުރި 23,356.1 މެޓްރިކް ޓަނާ އަޅާބަލާއިރު 66.1 އިންސައްތައިގެ އިތުރުވުމެކެވެ. އެންމެ ގިނަ މިންވަރެއްގެ މަސް ބޭރުކޮށްފައިވަނީވެސް އެޕްރީލް މަހު ކަމަށްވާއިރު، އެމަހު 9,700 މެޓްރިކް ޓަނުގެ މަސް ވަނީ ބޭރުކޮށްފައެވެ.
މަސްވެރިކަމުގެ ސިނާއަތުން އިގްތިސާދަށް ހިއްސާކުރާ މިންވަރު އިތުރުކުރުމަކީ ސަރުކާރުގެ މުހިންމު އަމާޒެއް ކަމަށްވާއިރު، "ތިން އަހަރު ތެރޭގައި މަސް ޕްރޮސެސިންގ ކެޕޭސިޓީ 9 ގުނަ އިތުރުކުރުމަކީ ސަރުކާރުގެ އަމާޒު" ކަމަށް މަސްވެރިކަމާބެހޭ ވަޒީރު އަހުމަދު ޝިޔާމް ވަނީ ވިދާޅުވެފައެވެ.
މިކަން ހާސިލުކުރުމަށްޓަކައި މަސް ޕްރޮސެސްކުރުމުގެ ކެޕޭސިޓީ އިތުރުކުރުމާއި، މަސް ރައްކާކުރުމުގެ ވަސީލަތްތައް އިތުރުކުރުމުގެ މަސައްކަތް ސަރުކާރުން ދަނީ ކުރަމުންނެވެ.
