މިއަހަރުގެ ދެވަނަ ކުއާޓަރގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށް 27.9 މިލިޔަން ރުފިޔާގެ ސާފު ފައިދާއެއް ލިބިފައިވާކަމަށް އެ ކުންފުނިން ހާމަކޮށްފިއެވެ.
އެމްޓީސީސީގެ ދެވަނަ ކުއާޓަރގެ މާލީ ރިޕޯޓުގައިވާ ގޮތުން، މި ކުއާޓަރގައި ކުންފުންޏަށް 490.3 މިލިޔަން ރުފިޔާގެ އާމްދަނީއެއް ލިބިފައިވެއެވެ. މިއީ އަހަރުގެ ފުރަތަމަ ކުއާޓަރާ އަޅާބަލާއިރު 17.7 އިންސައްތައިގެ ކުރިއެރުމެކެވެ. ފުރަތަމަ ކުއާޓަރުގައި ކުންފުންޏަށް ލިބުނު އާމްދަނީއަކީ 418.4 މިލިޔަން ރުފިޔާއެވެ.
ދެވަނަ ކުއާޓަރުގައި ކުންފުންޏަށް ޖުމްލަ ފައިދާގެ ގޮތުގައި 72.7 މިލިޔަން ރުފިޔާ ލިބިފައިވާއިރު، ކުންފުނި ހިންގައިގެން 49.7 މިލިޔަން ރުފިޔާގެ ފައިދާއެއް ވަނީ ލިބިފައެވެ. މިއީ ފާހަގަކޮށްލެވޭ ކުރިއެރުމެކެވެ. ސަބަބަކީ ފުރަތަމަ ކުއާޓަރުގައި ކުންފުނި ހިންގައިގެން 1.3 މިލިޔަން ރުފިޔާގެ ގެއްލުމެއް ވަނީ ލިބިފައެވެ.
އެމްޓީސީސީގެ މައިގަނޑު އާމްދަނީ ލިބެނީ އިމާރާތްކުރުމާއި ބިން ހިއްކުމުގެ މަސައްކަތްތަކުންނެވެ. މި ދާއިރާއިން ދެވަނަ ކުއާޓަރުގައި 498.9 މިލިޔަން ރުފިޔާ ލިބިފައިވާކަން ފާހަގަކުރެވެއެވެ. މި ކުއާޓަރުގައި ކުންފުނިން ވަނީ 313 މަޝްރޫޢެއްގެ މަސައްކަތް ކުރިއަށް ގެންގޮސްފައެވެ.
އެމްޓީސީސީގެ މަޝްރޫޢުތަކަށް ބަލާއިރު، ދެވަނަ ކުއާޓަރުގައި 9 މަޝްރޫޢެއްގެ މަސައްކަތް ވަނީ ނިންމާލެވިފައެވެ. އަދި 64 އައު މަޝްރޫޢެއްގެ މަސައްކަތް ވަނީ އަލަށް ފެށިފައެވެ. މިއީ ކުންފުނީގެ މަސައްކަތްތައް ހަލުވި ދުވެއްޔެއްގައި ކުރިއަށްދާކަން ދައްކުވައިދޭ ހެއްކެކެވެ.
