މިއަހަރުގެ މިހާތަނަށް ރާއްޖެއަށް 1.5 މިލިޔަނަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި ސެޕްޓެމްބަރ 7 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ 1،520،699 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.7 އިންސައްތައިގެ ކުރިއެރުމެކެވެ.
ސެޕްޓެމްބަރ މަހުގެ ފުރަތަމަ ހަތް ދުވަހުގެ ތެރޭގައި ރާއްޖެއަށް 33،773 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 23.6 އިންސައްތައިގެ އިތުރުވުމެކެވެ. މިހާރު ރާއްޖެއަށް އެވްރެޖްކޮށް ދުވާލަކު 6000 އަށްވުރެ ގިނަ ފަތުރުވެރިން ޒިޔާރަތްކުރަމުންދެއެވެ.
ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރަނީ ޗައިނާއިންނެވެ. އެ ޤައުމުން މިހާތަނަށް 240،828 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. ދެވަނައަށް އެންމެ ގިނައިން ފަތުރުވެރިން އަންނަ ޤައުމަކީ ރަޝިއާއެވެ. އެ ޤައުމުން 182،315 ފަތުރުވެރިން ޒިޔާރަތްކޮށްފައިވެއެވެ. މީގެ އިތުރުން އިނގިރޭސިވިލާތް، އިޓަލީވިލާތް އަދި ޖަރުމަނުވިލާތުން ވެސް ވަނީ ކޮންމެ ޤައުމަކުން ލައްކައަކަށްވުރެ ގިނަ ފަތުރުވެރިން ރާއްޖެއަށް ގެނެސްފައެވެ.
މިއަހަރު ރާއްޖެއަށް 2.3 މިލިޔަން ފަތުރުވެރިން ގެނައުމަށް ސަރުކާރުން ވަނީ އަމާޒުހިފާފައެވެ. މި އަމާޒު ހާސިލްކުރުމަށް އަހަރުގެ ބާކީ އޮތް މުއްދަތުގައި އިތުރު 8 ލައްކަ ފަތުރުވެރިން ގެންނަން ޖެހެއެވެ. ފަތުރުވެރިކަމާ ބެހޭ ވުޒާރާއިން ބުނާގޮތުގައި މި އަމާޒު ހާސިލްވާނެކަމުގެ އުންމީދު ބޮޑެވެ.
ފާހަގަކޮށްލެވޭ ކަމަކީ ރާއްޖެއަކީ ދުނިޔޭގެ އެންމެ މަޤްބޫލު ފަތުރުވެރި މަންޒިލްގެ އެވޯޑް ވިދިވިދިގެން ފަސް ފަހަރު ހާސިލްކޮށްފައިވާ ޤައުމެކެވެ. މި ކާމިޔާބީ ހޯދުމުގައި ކޮންމެ ފަތުރުވެރިއަކީވެސް މުހިންމު ބައިވެރިއެއްކަމަށް ވުޒާރާއިން ފާހަގަކުރެއެވެ.
