ކުޑަކުދިންނަކީ އެކުދިންނަށް ކުރެވޭ ގިނަ ކަންތަކަކީ ކޮންކަހަލަ ކަމެއްކަން ނޭޭންގޭވަރުގެ މަޢުޞޫމް ބައެކެވެ. ބައެއްފަހަރު، ކުދިންނަށް ކުރެވޭ ކަންތައްތަކުގެ ސަބަބުން މައިންބަފައިން ރުޅިގަދަވެ، ލޭމައްޗަށްދާފަހަރުވެސް އާދެއެވެ. މީގެ ސަބަބުން އިޙްތިޔާރަކާ ނުލައިވެސް ކުދިންނާ ދިމާއަށް ބާރަށް ހަޅެއްލެވި އަޑުލެވޭތަން އާދެއެވެ.
ކުއްޖާގެ އަމަލުތައް ހުންނަގޮތުން ނޫނީ ކުއްޖާއަށް ކުރެވޭ ކަމެއްގެ ސަބަބުން ހިތްހަމަ ނުޖެހި، ކުއްޖާއާއި ދިމާއަށް ބާރަށް ބަސް ބުނެވުމަކީ އިހްތިޔާރުން ބޭރުގައިނަމަވެސް ގިނަ މައިންބަފައިންނަށް ކުރެވޭ ކަމެކެވެ. ކުދިންނާއި ދިމާލަށް އަޑުލައި ހެދުމުގެ ސަބަބުން އެކުދިންނަށް ނަފްސާނީ ގޮތުން ބޮޑެތި އަސަރުތައް ކުރެއެވެ.
މައިންބަފައިންނަކީވެސް އިންސާނުންނަށް ވާއިރު ރުޅި އާދެވުމަކީ ތަބީއީ ކަމެކެވެ. ބެލެނިވެރިން، ނޫނީ މައިންބަފައިން ކުދިންނާ ދިމާއަށް ބާރަށް ހަޅެއްލަވާ އަޑުލުމަކީ އެކުދިން ބޮޑެތި ވަމުން އަންނަ އިރު ނަފްސާނީ ގޮތުން އަސަރު ކުރާނެ ކަމެއްކަމަށް ދިރާސާ ކުރައްވާ ބޭފުޅުންގެ ދިރާސާތަކުން ދައްކައެވެ. ނަމަވެސް ވިސްނާލަންވީ ކުޑަކުދިންނާ ދިމާއަށް ބާރަށް ހަޅޭއްލަވާ އަޑުލުމަކީ ހައްލެއް ނޫންކަމެވެ.
ކުދިންނާ ދިމާއަށް ބާރަށް ހަޅެއްލަވާ، އެއްޗެހި ކިޔާ ހެދުމަކީ އެކުދިން ބޮޑެތި ވަމުން އަންނައިރު ހާއްސަކޮށް ފުރާވަރުގެ އުމުރުގައިވެސް އޭގެ ނޭދެވޭ އަސަރު ކުދިންނަށް ކުރާނެ ކަމެކެވެ. އަދި ކުދިންގެ ގައިގައި ތެޅުން ނޫނީ އަތް އިސްކުރުމަކީ އެއްގޮތަކަށްވެސް މައިންބަފައިން ކޮށްގެން ވާނެ ކަމެއް ނޫންނެވެ.
ދަރިން ކުޑައިރު އެކުދިންނާއި ދިމާއަށް ހަޅޭއްލަވާ އަޑުލުމަކީ އެކުދިންގެ ސިކުނޑީގެ ހެދިބޮޑުވުމަށް އަސަރު ކުރާނެ ކަމެކެވެ. ތުއްތު ކުއްޖާ ކުރާ ކަމެއްގެ ސަބަބުން އެކުއްޖާ އާއި ދިމާއަށް މައިންބަފައިން ބާރަށް އަޑުލެވޭ ފަހަރުތަކުގައި އެކުދިންގެ ފަރާތުން އޭގެ ބަދަލުގައި ނޭދެވޭ ކަމެއް ފެނުމަކީ އެކަށީގެންވާ ކަމެކެވެ. މިގޮތުން މައިންބަފައިންގައިގައި ޖެހުން ނުވަތަ އަތް އިސްކުރުން ފަދަ އާދަތައް ކުއްޖާގެ ކިބައިގައި އަށަގަތުމަކީ އެކަށީގެންވާ ކަމެކެވެ. އަދި މީގެ ސަބަބުން ކުއްޖާގެ ގައިގައި ނޭދެވޭ ސިފަތައް އަށަގަންނާނެ ކަމަކަށް ވާއިރު މިއީ މައިންބަފައިން އެއްގޮތަކަށްވެސް ކުރުން ރަނގަޅު ކަމެއް ނޫނެވެ.
ވަޒީފާގައި އުޅޭއިރު ތިމާ އަށް ކުރެވޭ ކަމެއްގެ ސަބަބުން ބޮޑުމީހާ ތިމާ އާއި ދިމާއަށް ހަޅޭއްލަވައި ގަތުމުން ތިމާއަށް އިހުސާސްވަނީ ކިހިނެއް ހެއްޔެވެ؟ ދެން ހިތަށް އަރުވާލާށެވެ. ތިމާގެ ތުއްތު ދަރިފުޅަށް ނޭނގުމެއްގެ ތެރޭ ކުރެވޭ ކަމެއްގެ ސަބަބުން އެކުއްޖާ އާއި ދިމާއަށް ބާރަށް އަޑުލައި ހެދުމުން އެ ތުއްތު ސިކުނޑިއަށް ކުރާނީ ކޮންކަހަލަ އަސަރެއް ހެއްޔެވެ؟ މިކަން މިގޮތަށް ހިނގާކަމަށް ވަނީނަމަ ބައެއްކުދިންނަށް ރީއްޗަށް ވިސްނައިދިނުމަކީ އުނދަގޫ ކަމަކަށްވެއެވެ. އެކުދިންނަށް އެއްޗެއް ވިސްނެނީ ހަމައެކަނި މައިންބަފައިން، އެކުދިންނާއި ދިމާއަށް ބާރަށް އަޑުލުމުންނެވެ.
ކުދިން ކުރާ ނޭދެވޭ ކަންތައް ހުއްޓުވާނީ ހަޅޭއްލަވައިގެން ނޫނެވެ. ކުއްޖާގެ އުމުރާ ގުޅޭގޮތަށް ވިސްނައިދީގެނެވެ. މިއީ ކުއްޖާ ބޮޑުވަމުން އަންނައިރު ރަނގަޅު އަހްލާގެއް ހިފެހެއްޓުމަށް ކޮންމެހެންވެސް އަޅުގަނޑުމެން ސަމާލުކަންދޭންޖެހޭ ކަމެކެވެ.
