ހދ.ނޮޅިވަރަންފަރުން ފުރައިގެން އެއަތޮޅު ހަނިމާދޫއަށް ދަތުރުކުރަނިކޮށް ލޯންޗް ބަންޑުން ޖަހާލި ހާދިސާގައި ނިޔާވި ފަސް މީހުން އެއް ވަޅެއްގައި، ހަނިމާދޫ ސަހަރާގައި ވަޅުލައިފިއެވެ.
ނިޔާވި ފަސް މީހުން ރޭ މެންދަމުން އަލިވެ 2:30 ހާއިރު ވަޅުލިއިރު، އެ މީހުންގެ ޖަނާޒާގައި ގިނަ އަދަދެއްގެ ބަޔަކު ބައިވެރިވެފައިވެއެވެ. އޭގެ ތެރޭގައި އެމީހުންގެ ޖަނާޒާގައި ބައިވެރިވުމަށްޓަކައި ނޮޅިވަރަންފަރުން ދިޔަ މީހުންވެސް ހިމެނެއެވެ.
ހިތާމަވެރި މި ހާދިސާގައި ނިޔާވެފައި ވަނީ ހުސައިން އަބްދުﷲ އާއި އޭނާގެ އަންހެނުން މަރިޔަމް މަނިކާއި، ދެމަފިރިންގެ ދަރިފުޅު ގުރައިޝާ އަބްދުﷲ އާއި އޭނާގެ ދަރިފުޅު އީރާ ހަސަން ޝިފާޒްގެ އިތުރުން، އައިޝަތު އަލީ އެވެ.
ކޮޅިގަނޑެއްގައި މި ލޯންޗު ބަންޑުންޖަހާލާފައިވަނީ، ޢާއްމުކޮށް ހަނިމާދޫ އެއާޕޯޓަށް ދަތުރުކުރާ ލޯންޗުތައް ވަދެ ނިކުތުމަށް ބޭނުންކުރާ ނެރު ނޫން ހަނިމާދޫ ދެކުނު ކޮޅާ ދިމާލުގައި އޮންނަ ނެރަކުން ވަންނަނިކޮށް ނެގި ބިޔަ ރާޅުތަކުގައި ޖެހިގެނެވެ.
މި ހާދިސާ ހިނގިއިރު ކެޕްޓަނާއެކު ލޯންޗުން 10 މީހުން ދަތުރުކުރިއިރު، ނިޔާވެފައިވަނީ ލޯންޗު ބަންޑުން ޖަހާލުމުން އޭގެ ތެރެއިން ނުނިކުމެވުނު މީހުންނާއި، އެމީހުން ސަލާމަތްކުރަން ދިޔަ ހުސައިން ޢަބްދުﷲ އެވެ.
މި ހާދިސާގައި އަނިޔާވި ފަސް މީހުންނަށް ހަނިމާދޫ ޞީއްޙީމަރުކަޒުގައި ފަރުވާދީފައިވާއިރު، އޭގެ ތެރެއިން ދެ މީހަކު މިހާރު ވަނީ ސިއްހީ މަރުކަޒުން ދޫކޮށްލާފައެވެ. ސިއްހީ މަރުކަޒުގައި ފަރުވާދެމުން އަންނަ މީހުން ތެރޭގައި މި ހާދިސާގައި ނިޔާވި އައިޝަތު އަލީގެ ފިރިމީހާ ހިމެނެއެވެ.
ޑިންގީ ބަންޑުން ޖަހާލުމުން ހާދިސާގެ ރިޕޯޓް އެމްއެންޑީއެފް އަށް ދީފައިވަނީ ލޯންޗުގެ ކެޕްޓަން ފަތާފައި ގޮސް ހަނިމާދޫއަށް އަރައިގެންނެވެ. އަދި ހާދިސާގައި ސަލާމަތްވި މީހުންގެ މަސައްކަތުން ނިޔާވި މީހުންގެ ހަށިގަނޑުތައްވެސް ދުރަށް ދިޔަ ނުދީ ވާޖަހައިގެން ހިފެހެއްޓިކަމަށް މަޢުލޫމާތު ލިބިފައިވެއެވެ.
އެމްއެންޑީއެފް އިން ވިދާޅުވީ، މި ހާދިސާގެ ރިޕޯޓް ލިބުމާއެކު ވަރަށް އަވަސް ފުރުޞަތެއްގައި ހަނިމާދޫ ޕޯސްޓުގައި ތިބި ސިފައިން އެޓެންޑްކޮށްފައިވާ ކަމަށާއި، މޫދުން ނެގި މީހުންނަށް އަވަސް ފަރުވާވެސް ދީފައިވާ ކަމަށެވެ. އަދި މޫދުން ނެގި މީހުން ލައިފްޖެކެޓް އަޅާފައި ނުވާކަން އެމްއެންޑީއެފް އިން ވަނީ ފާހަގަކޮށްފައެވެ.
