އައްޑޫ ސިޓީގެ ގުޅިފައިވާ ރަށްރަށުން ހޮނިހިރު ދުވަހު ހަތް ގަޑިއިރަށް ކަރަންޓް ކަނޑާލަން ފެނަކަ ކޯޕަރޭޝަންއިން ނިންމައިފިއެވެ.
ފެނަކަ ކޯޕަރޭޝަނުން އައްޑޫ ސިޓީގެ ގޭގެއަށް ފޮނުވާފައިވާ ނޯޓިސްގައި ބުނެފައިވަނީ ކޭބަލް ނެޓްވޯކުގެ މަރާމާތަކަށް ސެޕްޓެމްބަރ 14 ވާ ހޮނިހިރު ދުވަހުގެ ހެނދުނު 9 އިން ހަވީރު 4 ޖެހުމާއި ހަމައަށް 7 ގަޑިއިރަށް ކަަރަންޓު ކަނޑާލުމަށް ނިންމާފައިވާ ކަމަށެވެ.
"ކަނޑައެޅިފައިވާ ގޮތަށް މަސައްކަތް ކުރިއަށް ގެންގޮސް ނިންމާލެވިއްޖެނަމަ 7 ގަޑި އިރުވުމުގެ ކުރިންވެސް ކަރަންޓު ފޯރު ކޮށްދެވިދާނެ" ކަމަށް ފެނަކައިން ފޮނުވާފައިވާ ނޯޓިސްގައިވެއެވެ.
އައްޑޫ މަރުކަޒީ އިންޖީނުގޭގެ އިންޖީނަކަށް މައްސަލަ ޖެހި މިދިޔަ އާދީއްތަ ދުވަހުގެ ހަވީރުން ފެށިގެން ދަންވަރު 1 ޖެހުމާއި ހަމައަށް އައްޑޫގެ ގުޅިފައިވާ ރަށްތަކުން ކަރަންޓު ކެނޑި ރައްޔިތުންނަށް ބޮޑެތި ތަކުލީފުތަކެއް ވަނީ ކުރިމަތިވެފައެވެ.
އައްޑޫގެ ގުޅިފައިވާ ރަށްތަކުން ކަރަންޓު ކެނޑުމުގެ މައްސަލައަކީ ފާއިތުވި ތިން ސަރުކާރަށްވެސް ހައްލު ހޯދައި ނުދެވިވާ މައްސަލައެކެވެ.