ބައިނަލްޢަގްވާމީ އަންހެންކުދިންގެ ދުވަހުގެ މުނާސަބަތުގައި ޑިފެންސް މިނިސްޓަރު އަލްއުސްތާޛު މާރިޔާ އަޙްމަދު ދީދީ މިއަދު ކުރެއްވި ޓްވީޓްގައިވާ ފޮޓޯއިން ފެންނަނީ ހަނަފަސް ސަހަރާއެއްގެ ތެރޭގައި، މިނިވަން ޖައްވުގައި އެއްވެސް ހިފެހެއްޓުމެއްނެތިވާ މަންޒަރެވެ.

މި ފޮޓާއާއެކު ޑިފެންސް މިނިސްޓަރު މާރިޔާ ކުރެއްވި ޓްވީޓްގައި ބުނެފައިވަނީ، ބައިނަލްޢަގްވާމީ އަންހެންކުދިންގެ ދުވަހުގެ ތަހުނިޔާ އަރިސްކުރަން ކަމަށާއި، އަންހެންވަންތަކަންނެރި އުމުރަކަށް ނުބަލާ ނިކުމެ އުދުއްސައި ގަތުމަށްވެސް މި ޓްވީޓްގައި މިނިސްޓަރު ގޮވާލާފަވެއެވެ.

މާރިޔާ ޓްވީޓް ކުރައްވާފައިވާ މި ފޮޓޯއަކީ އެކަމަނާ، ޔޫ.އޭ.އީއަށް ކުރެއްވި ދަތުރުފުޅުގައި ނަންގަވާފައިވާ ފޮޓޯއެއްކަމަށް ބެލެވެއެވެ.

މެދުއިރުމަތީގައި ބާއްވާ އެންމެ ބޮޑު އެއް ޓެކްނޮލޮޖީ އެގްޒިބިޝަން ކަމަށްވާ “ގަލްފް އިންފޮމޭޝަން ޓެކްނޮލޮޖީ އެގްޒިބިޝަން – ޖައިޓެކްސް” ގައި ތަޤްރީރު ކުރެއްވުމަށް ލިބިވަޑައިގެންނެވި ދަޢުވަތަށް އެކަމަނާ ނިމިދިޔަ ހަފްތާގައި ވަނީ ދަތުރު ކުރައްވާފައެވެ.

މާރިޔާ ޔޫއޭއީއަށް ވަޑައިގެންނެވީ އެކަމަނާގެ ދަރިކަލުންނާއެކު އެވެ. އެކަމަނާ މިއަދު ކުރެއްވި ޓްވީޓެއްގައި ވިދާޅުވީ، ދަތުރަށް ދައުލަތުން އެއްވެސް ފައިސާއެއް ހޭދަކޮށްފައި ނުވާކަމަށާއި، އެ ދަތުރުފުޅުގައި ބައިވެރިވެވަޑައިގެންނެވި "އާއިލާ މެމްބަރަކަށްވެސް" ދައުލަތުން ޚަރަދު ކޮށްފައި ނުވާނެ ކަމަށެވެ.