ސަރުކާރުގެ ހިއްސާވާ ކުންފުނި، މޯލްޑިވްސް ޓްރާންސްޕޯޓް އެންޓް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ބަހަކުން ޖެހި ޒުވާން އަންހެން ކުއްޖަކު ނިޔާވެއްޖެއެވެ.
13 އަހަރުގެ މި އަންހެން ކުއްޖާ ނިޔާވެފައިވަނީ ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި މިރޭ އިރާކޮޅެވެ.
ފުލުހުން ވިދާޅުވީ، މިރޭ 22:40 ހާއިރު ހުޅުމާލެ ނިރޮޅުމަގުން އައިސް ހައިވޭއަށް އަރާ ހިސާބު ޓާމިނަލް ކައިރިން ސައިކަލަކާއި، އެމްޓީސީސީގެ ބަހެއް ޖެހި އެކްސިޑެންޓް ވެފައިވާ ކަމަށެވެ.
"މި އެކްސިޑެންޓްގައި އަނިޔާވެފައިވަނީ ސައިކަލުގައި އިން 13 އަހަރުގެ އަންހެން ކުއްޖަކަށާއި، 51 އަހަރުގެ އަންހެނަކަށް. އަންހެން މީހާ ގެންގޮސްފައިވަނީ ހުޅުމާލެ ހޮސްޕިޓަލަށް އަދި 13 އަހަރުގެ ކުއްޖާ ގެންގޮސްފައިވަނީ ޓްރީޓޮޕް ހޮސްޕިޓަލަށް." ފުލުހުން ވިދާޅުވިއެވެ.
ފުލުހުން ވިދާޅުވީ 13 އަހަރުގެ އަންހެން ކުއްޖާ ހޮސްޕިޓަލަށް ގެންދިޔައިރުވެސް ނިޔާވެފައިވާ ކަމަށް މަޢުލޫމާތު ލިބިފައިވާ ކަމަށާއި، 51 އަހަރުގެ އަންހެން މީހާ ސީރިއަސް ނޫންކަމަށް މަޢުލޫމާތު ލިބިފައިވާ ކަމަށެވެ.
އެކްސިޑެންޓްވުމުން ބަސް ޑްރައިވަރު ބަސް ނުހުއްޓާ ގޮސްފައިވާއިރު، މި މައްސަލަ ފުލުހުން ދަނީ އިތުރަށް ތަޙްޤީޤު ކުރަމުންނެވެ.
